ಸಾ ಹೋವಾಚ — ಯತ್ ಊರ್ಧ್ವಮ್ ಉಪರಿ ದಿವಃ ಅಂಡಕಪಾಲಾತ್ , ಯಚ್ಚ ಅವಾಕ್ ಅಧಃ ಪೃಥಿವ್ಯಾಃ ಅಧೋಽಂಡಕಪಾಲಾತ್ , ಯಚ್ಚ ಅಂತರಾ ಮಧ್ಯೇ ದ್ಯಾವಾಪೃಥಿವೀ ದ್ಯಾವಾಪೃಥಿವ್ಯೋಃ ಅಂಡಕಪಾಲಯೋಃ, ಇಮೇ ಚ ದ್ಯಾವಾಪೃಥಿವೀ, ಯದ್ಭೂತಂ ಯಚ್ಚಾತೀತಮ್ , ಭವಚ್ಚ ವರ್ತಮಾನಂ ಸ್ವವ್ಯಾಪಾರಸ್ಥಮ್ , ಭವಿಷ್ಯಚ್ಚ ವರ್ತಮಾನಾದೂರ್ಧ್ವಕಾಲಭಾವಿ ಲಿಂಗಗಮ್ಯಮ್ — ಯತ್ಸರ್ವಮೇತದಾಚಕ್ಷತೇ ಕಥಯಂತ್ಯಾಗಮತಃ — ತತ್ಸರ್ವಂ ದ್ವೈತಜಾತಂ ಯಸ್ಮಿನ್ನೇಕೀಭವತೀತ್ಯರ್ಥಃ — ತತ್ ಸೂತ್ರಸಂಜ್ಞಂ ಪೂರ್ವೋಕ್ತಂ ಕಸ್ಮಿನ್ ಓತಂ ಚ ಪ್ರೋತಂ ಚ ಪೃಥಿವೀಧಾತುರಿವಾಪ್ಸು ॥