ఇతశ్చాస్తి తదక్షరమ్ , యస్మాత్ తదజ్ఞానే నియతా సంసారోపపత్తిః ; భవితవ్యం తు తేన, యద్విజ్ఞానాత్ తద్విచ్ఛేదః, న్యాయోపపత్తేః । నను క్రియాత ఎవ తద్విచ్ఛిత్తిః స్యాదితి చేత్ , న — యో వా ఎతదక్షరం హే గార్గి అవిదిత్వా అవిజ్ఞాయ అస్మిన్ లోకే జుహోతి యజతే తపస్తప్యతే యద్యపి బహూని వర్షసహస్రాణి, అన్తవదేవాస్య తత్ఫలం భవతి, తత్ఫలోపభోగాన్తే క్షీయన్త ఎవాస్య కర్మాణి । అపి చ యద్విజ్ఞానాత్కార్పణ్యాత్యయః సంసారవిచ్ఛేదః, యద్విజ్ఞానాభావాచ్చ కర్మకృత్ కృపణః కృతఫలస్యైవోపభోక్తా జననమరణప్రబన్ధారూఢః సంసరతి — తదస్తి అక్షరం ప్రశాసితృ ; తదేతదుచ్యతే — యో వా ఎతదక్షరం గార్గ్యవిదిత్వాస్మాల్లోకాత్ప్రైతి స కృపణః, పణక్రీత ఇవ దాసాదిః । అథ య ఎతదక్షరం గార్గి విదిత్వా అస్మాల్లోకాత్ప్రైతి స బ్రాహ్మణః ॥