తద్వా ఎతదక్షరం గార్గి అదృష్టమ్ , న కేనచిద్దృష్టమ్ , అవిషయత్వాత్ స్వయం తు ద్రష్టృ దృష్టిస్వరూపత్వాత్ । తథా అశ్రుతం శ్రోత్రావిషయత్వాత్ , స్వయం శ్రోతృ శ్రుతిస్వరూపత్వాత్ । తథా అమతం మనసోఽవిషయత్వాత్ స్వయం మన్తృ మతిస్వరూపత్వాత్ । తథా అవిజ్ఞాతం బుద్ధేరవిషయత్వాత్ , స్వయం విజ్ఞాతృ విజ్ఞానస్వరూపత్వాత్ । కిం చ నాన్యత్ అతః అస్మాదక్షరాత్ అస్తి — నాస్తి కిఞ్చిద్ద్రష్టృ దర్శనక్రియాకర్తృ ; ఎతదేవాక్షరం దర్శనక్రియాకర్తృ సర్వత్ర । తథా నాన్యదతోఽస్తి శ్రోతృ ; తదేవాక్షరం శ్రోతృ సర్వత్ర । నాన్యదతోఽస్తి మన్తృ ; తదేవాక్షరం మన్తృ సర్వత్ర సర్వమనోద్వారేణ । నాన్యదతోఽస్తి విజ్ఞాతృ విజ్ఞానక్రియాకర్తృ, తదేవాక్షరం సర్వబుద్ధిద్వారేణ విజ్ఞానక్రియాకర్తృ, నాచేతనం ప్రధానమ్ అన్యద్వా । ఎతస్మిన్ను ఖల్వక్షరే గార్గ్యాకాశ ఓతశ్చ ప్రోతశ్చేతి । యదేవ సాక్షాదపరోక్షాద్బ్రహ్మ, య ఆత్మా సర్వాన్తరః అశనాయాదిసంసారధర్మాతీతః, యస్మిన్నాకాశ ఓతశ్చ ప్రోతశ్చ — ఎషా పరా కాష్ఠా, ఎషా పరా గతిః, ఎతత్పరం బ్రహ్మ, ఎతత్పృథివ్యాదేరాకాశాన్తస్య సత్యస్య సత్యమ్ ॥