అథ హైనం విదగ్ధ ఇతి నామతః, శకలస్యాపత్యం శాకల్యః, పప్రచ్ఛ — కతిసఙ్ఖ్యాకా దేవాః హే యాజ్ఞవల్క్యేతి । స యాజ్ఞవల్క్యః, హ కిల, ఎతయైవ వక్ష్యమాణయా నివిదా ప్రతిపేదే సఙ్ఖ్యామ్ , యాం సఙ్ఖ్యాం పృష్టవాన్ శాకల్యః ; యావన్తః యావత్సఙ్ఖ్యాకా దేవాః వైశ్వదేవస్య శస్త్రస్య నివిది — నివిన్నామ దేవతాసఙ్ఖ్యావాచకాని మన్త్రపదాని కానిచిద్వైశ్వదేవే శస్త్రే శస్యన్తే, తాని నివిత్సంజ్ఞకాని ; తస్యాం నివిది యావన్తో దేవాః శ్రూయన్తే, తావన్తో దేవా ఇతి । కా పునః సా నివిదితి తాని నివిత్పదాని ప్రదర్శ్యన్తే — త్రయశ్చ త్రీ చ శతాత్రయశ్చ దేవాః, దేవానాం త్రీ చ త్రీణి చ శతాని ; పునరప్యేవం త్రయశ్చ, త్రీ చ సహస్రా సహస్రాణి — ఎతావన్తో దేవా ఇతి । శాకల్యోఽపి ఓమితి హోవాచ । ఎవమేషాం మధ్యమా సఙ్ఖ్యా సమ్యక్తయా జ్ఞాతా ; పునస్తేషామేవ దేవానాం సఙ్కోచవిషయాం సఙ్ఖ్యాం పృచ్ఛతి — కత్యేవ దేవా యాజ్ఞవల్క్యేతి ; త్రయస్త్రింశత్ , షట్ , త్రయః, ద్వౌ, అధ్యర్ధః, ఎకః — ఇతి । దేవతాసఙ్కోచవికాసవిషయాం సఙ్ఖ్యాం పృష్ట్వా పునః సఙ్ఖ్యేయస్వరూపం పృచ్ఛతి — కతమే తే త్రయశ్చ త్రీ చ శతా త్రయశ్చ త్రీ చ సహస్రేతి ॥