ఉత్తరప్రశ్నప్రపఞ్చప్రతీకం గృహీత్వా తస్య తాత్పర్యమాహ —
కతమ ఇతి ।
తేషాం వస్వాదీనాం ప్రత్యేకం వస్వాదిత్రయే ప్రతిగణమిన్ద్రే ప్రజాపతౌ చైకైకస్యేత్యర్థః ।
తేషాం వసుత్వమేతేషు హీత్యాదివాక్యావష్టమ్భేన స్పష్టయతి —
ప్రాణినామితి ।
తేషాం కర్మణస్తత్ఫలస్య చాఽఽశ్రయత్వేన తేషామేవ నివాసత్వేన చ శరీరేన్ద్రియసముదాయాకారేణ విపరిణమన్తోఽగ్న్యాదయో జగదేతద్వాసయన్తి స్వయం చ తత్ర వసన్తి తస్మాద్యుక్తం తేషాం వసుత్వమిత్యర్థః ।
వసుత్వం నిగమయతి —
తే యస్మాదితి ॥౩॥