ಕತಮೇ ತೇ ತ್ರಯೋ ದೇವಾ ಇತಿ ; ಇಮ ಏವ ತ್ರಯೋ ಲೋಕಾ ಇತಿ — ಪೃಥಿವೀಮಗ್ನಿಂ ಚ ಏಕೀಕೃತ್ಯ ಏಕೋ ದೇವಃ, ಅಂತರಿಕ್ಷಂ ವಾಯುಂ ಚ ಏಕೀಕೃತ್ಯ ದ್ವಿತೀಯಃ, ದಿವಮಾದಿತ್ಯಂ ಚ ಏಕೀಕೃತ್ಯ ತೃತೀಯಃ — ತೇ ಏವ ತ್ರಯೋ ದೇವಾ ಇತಿ । ಏಷು, ಹಿ ಯಸ್ಮಾತ್ , ತ್ರಿಷು ದೇವೇಷು ಸರ್ವೇ ದೇವಾ ಅಂತರ್ಭವಂತಿ, ತೇನ ಏತ ಏವ ದೇವಾಸ್ತ್ರಯಃ — ಇತ್ಯೇಷ ನೈರುಕ್ತಾನಾಂ ಕೇಷಾಂಚಿತ್ಪಕ್ಷಃ । ಕತಮೌ ತೌ ದ್ವೌ ದೇವಾವಿತಿ — ಅನ್ನಂ ಚೈವ ಪ್ರಾಣಶ್ಚ ಏತೌ ದ್ವೌ ದೇವೌ ; ಅನಯೋಃ ಸರ್ವೇಷಾಮುಕ್ತಾನಾಮಂತರ್ಭಾವಃ । ಕತಮೋಽಧ್ಯರ್ಧ ಇತಿ — ಯೋಽಯಂ ಪವತೇ ವಾಯುಃ ॥