అథ హోవాచ । అథ అనన్తరం తూష్ణీమ్భూతేషు బ్రాహ్మణేషు హ ఉవాచ, హే బ్రాహ్మణా భగవన్త ఇత్యేవం సమ్బోధ్య — యో వః యుష్మాకం మధ్యే కామయతే ఇచ్ఛతి — యాజ్ఞవల్క్యం పృచ్ఛామీతి, స మా మామ్ ఆగత్య పృచ్ఛతు ; సర్వే వా మా పృచ్ఛత — సర్వే వా యూయం మా మాం పృచ్ఛత ; యో వః కామయతే — యాజ్ఞవల్క్యో మాం పృచ్ఛత్వితి, తం వః పృచ్ఛామి ; సర్వాన్వా వః యుష్మాన్ అహం పృచ్ఛామి । తే హ బ్రాహ్మణా న దధృషుః — తే బ్రాహ్మణా ఎవముక్తా అపి న ప్రగల్భాః సంవృత్తాః కిఞ్చిదపి ప్రత్యుత్తరం వక్తుమ్ ॥