ಪ್ರಸಂಗಾದಾಗತಂ ಪರಪಕ್ಷಂ ನಿರಾಕೃತ್ಯ ಶ್ರುತಿವ್ಯಾಖ್ಯಾನಮೇವಾನುವರ್ತಯನ್ನುತ್ತರವಾಕ್ಯತಾತ್ಪರ್ಯಮಾಹ —
ಯಥೇತಿ ।
ಏವಮಾತ್ಮಾ ದೇಹಭೇದೇಽಪಿ ವರ್ತಮಾನಂ ಜನ್ಮ ತ್ಯಜಂಜನ್ಮಾಂತರಂ ಚೋಪಾದದಾನಃ ಕಾರ್ಯಕರಣಾನ್ಯತಿಕ್ರಾಮತೀತಿ ಶೇಷಃ । ಅತಃ ಸ್ವಪ್ರಜಾಗರಿತಸಂಚಾರಾದ್ದೇಹಾದ್ಯತಿರೇಕವದಿಹಲೋಕಪರಲೋಕಸಂಚಾರೋಕ್ತ್ಯಾಽಪಿ ತದತಿರೇಕಸ್ತಸ್ಯೋಚ್ಯತೇಽನಂತರವಾಕ್ಯೇನೇತ್ಯರ್ಥಃ ।
ಸಂಪ್ರತ್ಯುತ್ತರಂ ವಾಕ್ಯಂ ಗೃಹೀತ್ವಾ ವ್ಯಾಕರೋತಿ —
ಸ ವಾ ಇತ್ಯಾದಿನಾ ।
ಪಾಪ್ಮಶಬ್ದಸ್ಯ ಲಕ್ಷಣಯಾ ತತ್ಕಾರ್ಯವಿಷಯತ್ವಂ ದರ್ಶಯತಿ —
ಪಾಪ್ಮಸಮವಾಯಿಭಿರಿತಿ ।
ಪಾಪ್ಮಶಬ್ದಸ್ಯ ಪಾಪವಾಚಿತ್ವೇಽಪಿ ಕಾರ್ಯಸಾಮ್ಯಾದ್ಧರ್ಮೇಽಪಿ ವೃತ್ತಿಂ ಸೂಚಯತಿ —
ಧರ್ಮಾಧರ್ಮೇತಿ ।
ಉಕ್ತಮರ್ಥಂ ದೃಷ್ಟಾಂತತ್ವೇನಾನುವದತಿ —
ಯಥೇತಿ ।
ಅವಸ್ಥಾದ್ವಯಸಂಚಾರಸ್ಯ ಲೋಕದ್ವಯಸಂಚಾರಂ ದಾರ್ಷ್ಟಾಂತಿಕಮಾಹ —
ತಥೇತಿ ।
ಇಹಲೋಕಪರಲೋಕಾನವರತಂ ಸಂಚರತೀತಿ ಸಂಬಂಧಃ ।
ಸಂಚರಣಪ್ರಕಾರಂ ಪ್ರಕಟಯತಿ —
ಜನ್ಮೇತಿ ।
ಜನ್ಮನಾ ಕಾರ್ಯಕರಣಯೋರುಪಾದನಂ ಮರಣೇನ ಚ ತಯೋಸ್ತ್ಯಾಗಮವಿಚ್ಛೇದೇನ ಲಭಮಾನೋ ಮೋಕ್ಷಾದರ್ವಾಗನವರತಂ ಸಂಚರಂದುಃಖೀ ಭವತೀತ್ಯರ್ಥಃ ।
ಸ ವಾ ಇತ್ಯಾದಿವಾಕ್ಯತಾತ್ಪರ್ಯಮುಪಸಂಹರತಿ —
ತಸ್ಮಾದಿತಿ ।
ತಚ್ಛಬ್ದಾರ್ಥಮೇವ ಸ್ಫುಟಯತಿ —
ಸಂಯೋಗೇತಿ ।
ಕಥಮೇತಾವತಾ ತೇಭ್ಯೋಽನ್ಯತ್ವಂ ತತ್ರಾಽಽಹ —
ನ ಹೀತಿ ।
ಸ್ವಾಭಾವಿಕಸ್ಯ ಹಿ ಧರ್ಮಸ್ಯ ಸತಿ ಸ್ವಭಾವೇ ಕುತಃ ಸಂಯೋಗವಿಯೋಗೌ ವಹ್ನ್ಯೌಷ್ಣ್ಯಾದಿಷ್ವದರ್ಶನಾತ್ಕಾರ್ಯಕರಣಯೋಶ್ಚ ಸಂಯೋಗವಿಭಾಗವಶಾದಸ್ವಾಭಾವಿಕತ್ವೇ ಸಿದ್ಧಮಾತ್ಮನಸ್ತದನ್ಯತ್ವಮಿತ್ಯರ್ಥಃ ॥ ೮ ॥