ತಥಾ ಪ್ರಾಣೇನ ಪಂಚವೃತ್ತಿನಾ, ರಕ್ಷನ್ ಪರಿಪಾಲಯನ್ — ಅನ್ಯಥಾ ಮೃತಭ್ರಾಂತಿಃ ಸ್ಯಾತ್ , ಅವರಮ್ ನಿಕೃಷ್ಟಮ್ ಅನೇಕಾಶುಚಿಸಂಘಾತತ್ವಾದತ್ಯಂತಬೀಭತ್ಸಮ್ , ಕುಲಾಯಂ ನೀಡಂ ಶರೀರಮ್ , ಸ್ವಯಂ ತು ಬಹಿಸ್ತಸ್ಮಾತ್ಕುಲಾಯಾತ್ , ಚರಿತ್ವಾ — ಯದ್ಯಪಿ ಶರೀರಸ್ಥ ಏವ ಸ್ವಪ್ನಂ ಪಶ್ಯತಿ ತಥಾಪಿ ತತ್ಸಂಬಂಧಾಭಾವಾತ್ ತತ್ಸ್ಥ ಇವ ಆಕಾಶಃ ಬಹಿಶ್ಚರಿತ್ವೇತ್ಯುಚ್ಯತೇ, ಅಮೃತಃ ಸ್ವಯಮಮರಣಧರ್ಮಾ, ಈಯತೇ ಗಚ್ಛತಿ, ಯತ್ರ ಕಾಮಮ್ — ಯತ್ರ ಯತ್ರ ಕಾಮಃ ವಿಷಯೇಷು ಉದ್ಭೂತವೃತ್ತಿರ್ಭವತಿ ತಂ ತಂ ಕಾಮಂ ವಾಸನಾರೂಪೇಣ ಉದ್ಭೂತಂ ಗಚ್ಛತಿ ॥