ತದೇತೇ — ಏತಸ್ಮಿನ್ ಉಕ್ತೇಽರ್ಥೇ ಏತೇ ಶ್ಲೋಕಾಃ ಮಂತ್ರಾಃ ಭವಂತಿ । ಸ್ವಪ್ನೇನ ಸ್ವಪ್ನಭಾವೇನ, ಶಾರೀರಮ್ ಶರೀರಮ್ , ಅಭಿಪ್ರಹತ್ಯ ನಿಶ್ಚೇಷ್ಟಮಾಪಾದ್ಯ ಅಸುಪ್ತಃ ಸ್ವಯಮ್ ಅಲುಪ್ತದೃಗಾದಿಶಕ್ತಿಸ್ವಾಭಾವ್ಯಾತ್ , ಸುಪ್ತಾನ್ ವಾಸನಾಕಾರೋದ್ಭೂತಾನ್ ಅಂತಃಕರಣವೃತ್ತ್ಯಾಶ್ರಯಾನ್ ಬಾಹ್ಯಾಧ್ಯಾತ್ಮಿಕಾನ್ ಸರ್ವಾನೇವ ಭಾವಾನ್ ಸ್ವೇನ ರೂಪೇಣ ಪ್ರತ್ಯಸ್ತಮಿತಾನ್ ಸುಪ್ತಾನ್ , ಅಭಿಚಾಕಶೀತಿ ಅಲುಪ್ತಯಾ ಆತ್ಮದೃಷ್ಟ್ಯಾ ಪಶ್ಯತಿ ಅವಭಾಸಯತೀತ್ಯರ್ಥಃ । ಶುಕ್ರಮ್ ಶುದ್ಧಂ ಜ್ಯೋತಿಷ್ಮದಿಂದ್ರಿಯಮಾತ್ರಾರೂಪಮ್ , ಆದಾಯ ಗೃಹೀತ್ವಾ, ಪುನಃ ಕರ್ಮಣೇ ಜಾಗರಿತಸ್ಥಾನಮ್ ಐತಿ ಆಗಚ್ಛತಿ, ಹಿರಣ್ಮಯಃ ಹಿರಣ್ಮಯ ಇವ ಚೈತನ್ಯಜ್ಯೋತಿಃಸ್ವಭಾವಃ, ಪುರುಷಃ, ಏಕಹಂಸಃ ಏಕ ಏವ ಹಂತೀತ್ಯೇಕಹಂಸಃ — ಏಕಃ ಜಾಗ್ರತ್ಸ್ವಪ್ನೇಹಲೋಕಪರಲೋಕಾದೀನ್ ಗಚ್ಛತೀತ್ಯೇಕಹಂಸಃ ॥