తథా ప్రాణేన పఞ్చవృత్తినా, రక్షన్ పరిపాలయన్ — అన్యథా మృతభ్రాన్తిః స్యాత్ , అవరమ్ నికృష్టమ్ అనేకాశుచిసఙ్ఘాతత్వాదత్యన్తబీభత్సమ్ , కులాయం నీడం శరీరమ్ , స్వయం తు బహిస్తస్మాత్కులాయాత్ , చరిత్వా — యద్యపి శరీరస్థ ఎవ స్వప్నం పశ్యతి తథాపి తత్సమ్బన్ధాభావాత్ తత్స్థ ఇవ ఆకాశః బహిశ్చరిత్వేత్యుచ్యతే, అమృతః స్వయమమరణధర్మా, ఈయతే గచ్ఛతి, యత్ర కామమ్ — యత్ర యత్ర కామః విషయేషు ఉద్భూతవృత్తిర్భవతి తం తం కామం వాసనారూపేణ ఉద్భూతం గచ్ఛతి ॥