ತತ್ ತತ್ರ ದೇಹಾಂತರಸಂಚಾರೇ ಇದಂ ನಿದರ್ಶನಮ್ — ಯಥಾ ಯೇನ ಪ್ರಕಾರೇಣ ತೃಣಜಲಾಯುಕಾ ತೃಣಜಲೂಕಾ ತೃಣಸ್ಯ ಅಂತಮ್ ಅವಸಾನಮ್ , ಗತ್ವಾ ಪ್ರಾಪ್ಯ, ಅನ್ಯಂ ತೃಣಾಂತರಮ್ , ಆಕ್ರಮಮ್ — ಆಕ್ರಮ್ಯತ ಇತ್ಯಾಕ್ರಮಃ — ತಮಾಕ್ರಮಮ್ , ಆಕ್ರಮ್ಯ ಆಶ್ರಿತ್ಯ, ಆತ್ಮಾನಮ್ ಆತ್ಮನಃ ಪೂರ್ವಾವಯವಮ್ ಉಪಸಂಹರತಿ ಅಂತ್ಯಾವಯವಸ್ಥಾನೇ ; ಏವಮೇವ ಅಯಮಾತ್ಮಾ ಯಃ ಪ್ರಕೃತಃ ಸಂಸಾರೀ ಇದಂ ಶರೀರಂ ಪೂರ್ವೋಪಾತ್ತಮ್ , ನಿಹತ್ಯ ಸ್ವಪ್ನಂ ಪ್ರತಿಪಿತ್ಸುರಿವ ಪಾತಯಿತ್ವಾ ಅವಿದ್ಯಾಂ ಗಮಯಿತ್ವಾ ಅಚೇತನಂ ಕೃತ್ವಾ ಸ್ವಾತ್ಮೋಪಸಂಹಾರೇಣ, ಅನ್ಯಮ್ ಆಕ್ರಮಮ್ ತೃಣಾಂತರಮಿವ ತೃಣಜಲೂಕಾ ಶರೀರಾಂತರಮ್ , ಗೃಹೀತ್ವಾ ಪ್ರಸಾರಿತಯಾ ವಾಸನಯಾ, ಆತ್ಮಾನಮುಪಸಂಹರತಿ, ತತ್ರ ಆತ್ಮಭಾವಮಾರಭತೇ — ಯಥಾ ಸ್ವಪ್ನೇ ದೇಹಾಂತರಸ್ಥ ಏವ ಶರೀರಾರಂಭದೇಶೇ — ಆರಭ್ಯಮಾಣೇ ದೇಹೇ ಜಂಗಮೇ ಸ್ಥಾವರೇ ವಾ । ತತ್ರ ಚ ಕರ್ಮವಶಾತ್ ಕರಣಾನಿ ಲಬ್ಧವೃತ್ತೀನಿ ಸಂಹನ್ಯಂತೇ ; ಬಾಹ್ಯಂ ಚ ಕುಶಮೃತ್ತಿಕಾಸ್ಥಾನೀಯಂ ಶರೀರಮಾರಭ್ಯತೇ ; ತತ್ರ ಚ ಕರಣವ್ಯೂಹಮಪೇಕ್ಷ್ಯ ವಾಗಾದ್ಯನುಗ್ರಹಾಯ ಅಗ್ನ್ಯಾದಿದೇವತಾಃ ಸಂಶ್ರಯಂತೇ । ಏಷ ದೇಹಾಂತರಾರಂಭವಿಧಿಃ ॥