తత్ తత్ర ఎతస్మిన్నర్థే, యథా పేశస్కారీ — పేశః సువర్ణమ్ తత్ కరోతీతి పేశస్కారీ సువర్ణకారః, పేశసః సువర్ణస్య మాత్రామ్ , అప ఆదాయ అపచ్ఛిద్య గృహీత్వా, అన్యత్ పూర్వస్మాత్ రచనావిశేషాత్ నవతరమ్ అభినవతరమ్ , కల్యాణాత్ కల్యాణతరమ్ , రూపం తనుతే నిర్మినోతి ; ఎవమేవాయమాత్మేత్యాది పూర్వవత్ । నిత్యోపాత్తాన్యేవ పృథివ్యాదీని ఆకాశాన్తాని పఞ్చ భూతాని యాని ‘ద్వే వావ బ్రహ్మణో రూపే’ (బృ. ఉ. ౨ । ౩ । ౧) ఇతి చతుర్థే వ్యాఖ్యాతాని, పేశఃస్థానీయాని తాన్యేవ ఉపమృద్య, ఉపమృద్య, అన్యదన్యచ్చ దేహాన్తరం నవతరం కల్యాణతరం రూపం సంస్థానవిశేషమ్ , దేహాన్తరమిత్యర్థః, కురుతే — పిత్ర్యం వా పితృభ్యో హితమ్ , పితృలోకోపభోగయోగ్యమిత్యర్థః, గాన్ధర్వం గన్ధర్వాణాముపభోగయోగ్యమ్ , తథా దేవానాం దైవమ్ , ప్రజాపతేః ప్రాజాపత్యమ్ , బ్రహ్మణ ఇదం బ్రాహ్మం వా, యథాకర్మ యథాశ్రుతమ్ , అన్యేషాం వా భూతానాం సమ్బన్ధి — శరీరాన్తరం కురుతే ఇత్యభిసమ్బధ్యతే ॥