தஸ்மிந்நித்யாதி³பூர்வபக்ஷமுத்தா²பயதி —
தஸ்மிந்நிதி ।
விப்ரதிபத்திமேவ ப்ரஶ்நபூர்வகம் விஶத³யதி —
கத²மித்யாதி³நா ।
பிங்க³லம் வஹ்நிஜ்வாலாதுல்யம் । லோஹிதம் ஜபாகுஸுமஸம்நிப⁴ம் ।
ஸப்ரபஞ்சம் ஶப்³த³ஸ்பர்ஶரூபரஸாதி³மத்³ப்³ரஹ்ம தது³பாஸநமநுஸ்ருத்ய தத்ப்ராப்திமார்கே³ விவாதோ³ முமுக்ஷூணாமித்யாஹ —
யதா²த³ர்ஶநமிதி।
ததா²(அ)பி கத²ம் ப்³ரஹ்மப்ராப்திமார்கே³ ஶுக்லாதி³ரூபஸித்³தி⁴: ।
ந ஹி ஜ்ஞாநஸ்ய ரூபாதி³மத்த்வமித்யாஶங்க்யா(அ)(அ)ஹ —
நாட்³யஸ்த்விதி ।
தாஸாமபி கத²ம் யதோ²க்தரூபவத்த்வமித்யாஶங்க்யா(அ)(அ)ஹ —
ஶ்லேஷ்மாதீ³தி ।
ததா²(அ)பி கத²ம் ஶுக்லாதி³ரூபவத்த்வமித்யாஶங்க்ய நாடீ³க²ண்டோ³க்தம் ஸ்மாரயதி —
ஶுக்லஸ்யேதி ।
நாடீ³பரிக்³ரஹே நியாமகாபா⁴வமாஶங்க்ய பக்ஷாந்தரமாஹ —
ஆதி³த்யம் வேதி ।
ஏவம்வித⁴ம் ஶுக்லாதி³நாநாவர்ணமித்யர்த²: ।
தஸ்ய ததா²த்வே ப்ரமாணமாஹ —
ஏஷ இதி ।
ப்ரக்ருதே ஜ்ஞாநமார்கே³ கிமிதி மார்கா³ந்தரம் கல்ப்யதே தத்ரா(அ)(அ)ஹ —
த³ர்ஶநேதி ।
தர்ஹி நாடீ³பக்ஷோ வா(அ)(அ)தி³த்யபக்ஷோ வா கதரோ விவக்ஷிதஸ்தத்ரா(அ)(அ)ஹ —
ஸர்வதா²(அ)பீதி ।
ஶுக்லமார்க³ஸ்ய ஜ்ஞாநமார்கா³த³ந்யத்வமாக்ஷிபதி —
நந்விதி ।
ஶுக்லஶப்³த³ஸ்ய நாத்³வைதமார்க³விஷயத்வம் நீலாதி³ஶப்³த³ஸமபி⁴வ்யாஹாரவிரோதா⁴தி³தி பரிஹரதி —
ந நீலேதி ।
ஸைத்³தா⁴ந்திகமந்த்ரபா⁴க³ம் வ்யாக்²யாதும் பூர்வபக்ஷம் தூ³ஷயதி —
யாஞ்சு²க்லாதீ³நிதி ।
ந கேவலம் தே³ஹதே³ஶநி:ஸரணஸம்ப³ந்தா⁴தே³வ நாடீ³பே⁴தா³நாம் ஸம்ஸாரவிஷயத்வம் கிந்து ப்³ரஹ்மலோகாதி³ஸம்ப³ந்தா⁴த³பீத்யாஹ —
ப்³ரஹ்மாதீ³தி ।
ஆதி³த்யோ(அ)பி தே³வயாநமத்⁴யபாதீ ப்³ரஹ்மலோகப்ராபக: ஸம்ஸாரஹேதுரேவேதி மந்வாநோ மோக்ஷமார்க³முபஸம்ஹரதி —
தஸ்மாதி³தி ।
ஆப்தகாமதயா ஜ்ஞாநமார்க³ இதி ஸம்ப³ந்த⁴: । ஏவம் பூ⁴மிகாம் க்ருத்வைஷ இத்யஸ்யார்த²மாஹ —
ஸர்வகாமேதி ।
ததா² தைலாதி³விலயே ப்ரதீ³பஸ்ய ஜ்வலநாநுபபத்தௌ தேஜோமாத்ரே நிர்வாணமிஷ்யதே ததா² ஸ்தூ²லஸ்ய ஸூக்ஷ்மஸ்ய ச ஸர்வஸ்யைவ காமஸ்ய ஜ்ஞாநாத்க்ஷயே ஸதி க³த்யநுபபத்தாவத்ரைவ ப்ரத்யகா³த்மநி கார்யகரணாநாமேகீபா⁴வேநாவஸாநமித்யயமேஷஶப்³தா³ர்த² இத்யர்த²: ।
பந்தா² இத்யேதத்³வ்யாசஷ்டே —
ஜ்ஞாநமார்க³ இதி ।
இத்த²ம்பா⁴வே த்ருதீயாமாஶ்ரித்யா(அ)(அ)ஹ —
பரமாத்மேதி ।
அநுவேத³நகர்த்ருர்ப்³ராஹ்மணஸ்ய ஸம்ந்யாஸித்வம் த³ர்ஶயதி —
த்யக்தேதி ।
விப்ரதிபத்திம் நிராக்ருத்ய மோக்ஷமார்க³ம் நிர்தா⁴ர்ய தேந தீ⁴ரா அபியந்தீத்யத்ரோக்தம் நிக³மயதி —
தேநேதி ।
அந்யோ(அ)பி மந்த்ரத்³ருஶ: ஸகாஶாதி³தி ஶேஷ: । இஹேதி ஜீவத³வஸ்தோ²க்தி: ।
ஸமுச்சயகாரிணோ(அ)த்ர ப்³ரஹ்மப்ராப்திர்விவக்ஷ்யதேதி கேசித்தாந்ப்ரத்யாஹ —
ந புநரிதி ।
விரோதா⁴ஜ்ஜ்ஞாநகர்மணோரிதி ஶேஷ: ।
கிஞ்ச க்ரமஸமுச்சய: ஸமஸமுச்சயோ வேதி விகல்ப்யா(அ)(அ)த்³யமங்கீ³க்ருத்ய த்³வீதீயம் த்³ருஷயதி —
அபுண்யேதி ।
ஜ்ஞாநஸ்ய கர்மாஸமுச்சயே(அ)பி விவேகஜ்ஞாநேந ஸமுச்சயோ(அ)ஸ்தீத்யாஶங்க்யா(அ)(அ)ஹ —
த்யஜேதி ।
ப்³ரஹ்மவிதோ³(அ)பி ஸ்துத்யாதி³த்³ருஷ்டேஸ்தேந ஸமுச்சயோ ஜ்ஞாநஸ்யேத்யாஶங்க்யா(அ)(அ)ஹ —
நிராஶிஷமிதி ।
காம்யாநநுஷ்டா²நமநாரம்ப⁴: । அக்ஷீணத்வம் நிஷித்³தா⁴நாசரணம் । க்ஷீணகர்மத்வம் நித்யாதி³கர்மராஹித்யம் ।
அஸமுச்சயே வாக்யாந்தரமாஹ —
நேத்யாதி³நா ।
ஏகதா நிரபேக்ஷதா ஸர்வோதா³ஸீநதேதி யாவத் । ஸமதா மித்ரோதா³ஸீநஶத்ருபு³த்³தி⁴வ்யதிரேகேண ஸர்வத்ர ஸ்வஸ்மிந்நிவ த்³ருஷ்டி: । த³ண்ட³நிதா⁴நமஹிம்ஸாபரத்வம் ।
“அர்த²ஸ்ய மூலம் நிக்ருதி: க்ஷமா ச காமஸ்ய சித்தம் ச வபுர்வயஶ்ச ।
த⁴ர்மஸ்ய யாகா³தி³ த³யா த³மஶ்ச மோக்ஷஸ்ய ஸர்வோபரம: க்ரியாப்⁴ய:”॥
இத்யாதி³சதுர்விதே⁴ புருஷார்தே² ஸாத⁴நபே⁴தோ³பதே³ஶி வாக்யமாதி³ஶப்³தா³ர்த²: । இத்யாதி³ஸ்ம்ருதிப்⁴யஶ்ச ந புண்யாதி³ஸமுச்சயகாரிணோ க்³ரஹணமிதி ஸம்ப³ந்த⁴: ।
ததா²(அ)பி ப்ரக்ருதே மந்த்ரே ஸமுச்சயோ பா⁴தீத்யாஶங்க்யா(அ)(அ)ஹ —
உபதே³க்ஷ்யதீதி ।
வாக்யஶேஷாதி³பர்யாலோசநாஸித்³த⁴மர்த²முபஸம்ஹரதி —
தஸ்மாதி³தி ।
பூர்வம் புண்யக்ருத்³பூ⁴த்வா புநஸ்த்யக்தபுத்ராத்³யேஷணோ ப்³ரஹ்மவித்தேநைதீதி க்ரமோ ந யுஜ்யதே(அ)ஶ்ருதத்வாதி³த்யாஶங்க்யா(அ)(அ)ஹ —
அத²வேதி ।
ஸ்துதிமேவோபபாத³யதி —
புண்யக்ருதீதி ।
தேஜாம்ஸி கரணாந்யுபஸம்ஹ்ருத்ய ஸ்தி²தஸ்தைஜஸோ த³ஹராத்³யுபாஸீநோ யோகீ³ தஸ்மிந்நணிமாத்³யைஶ்வர்யாந்மஹாநுபா⁴வத்வப்ரஸித்³தி⁴: । தாப்⁴யாம் புண்யக்ருத்தைஜஸாப்⁴யாமித்யர்த²: ।
அத:ஶப்³த³பராம்ருஷ்டம் ஸ்பஷ்டயதி —
ப்ரக்²யாதேதி ।
புண்யக்ருத்தைஜஸயோரிதி ஶேஷ: ॥ 9 ॥