ராஜ்ஞோ(அ)கௌஶலம் பரிஹ்ருத்ய மந்த்ராநவதாரயதி —
ஆத்மகாமஸ்யேதி ।
யதே³த்யாத்³யதீதஶ்லோகேநா(அ)(அ)கா³மிஶ்லோகாநாமர்தா²பௌநருக்த்யம் ஸூசயதி —
விஸ்தரேதி ।
ஜ்ஞாநமார்க³ஸ்ய ஸூக்ஷ்மத்வே ஹேதுமாஹ —
து³ர்விஜ்ஞேயத்வாதி³தி ।
விஸ்தீர்ணத்வம் பூர்ணவஸ்துவிஷயத்வாத³வதே⁴யம் ।
மாத்⁴யந்தி³நஶ்ருதிமாஶ்ரித்யா(அ)(அ)ஹ —
விஸ்பஷ்டேதி ।
ப்ரயத்நஸாத்⁴யத்வம் தஸ்ய பஞ்சம்யா விவக்ஷ்யதே ।
கத²ம் புநரது⁴நாதநோ வைதி³கோ ஜ்ஞாநமார்க³ஶ்சிரந்தநோ நிருச்யதே தத்ரா(அ)(அ)ஹ —
நித்யேதி ।
விஶேஷணப்ரகாஶிதமர்த²முக்த்வா தஸ்ய வ்யவச்சே²த்³யமாஹ —
ந தார்கிகேதி ।
மந்த்ரத்³ருஶா லப்³த⁴த்வே(அ)பி குதோ ஜ்ஞாநமார்க³ஸ்ய தத்ஸம்ஸ்பர்ஶித்வமித்யாஶங்க்யா(அ)(அ)ஹ —
யோ ஹீதி ।
அநுவேத³நலாப⁴யோர்விஶேஷாபா⁴வாத்பௌநருக்த்யமாஶங்க்யா(அ)(அ)ஹ —
அநுவேத³நமிதி ।
பூர்வஶப்³தே³ந பாட²க்ரமாநுஸாரேண லாபோ⁴ க்³ருஹ்யதே । ஏவகாரமாஶ்ரித்ய ஶங்கதே —
கிமஸாவிதி ।
ததா² ச தத்³யோ யோ தே³வாநாமித்யாத்³யவிஶேஷஶ்ருதிர்விருத்⁴யேதேதி ஶேஷ: ।
அவதா⁴ரணஶ்ருதேரந்யபரத்வேநாந்யயோக³வ்யவச்சே²த³காபா⁴வமபி⁴ப்ரேத்ய பரிஹரதி —
நைஷ தோ³ஷ இதி ।
ஸ்துதிபரத்வமேவ ப்ரகடயதி —
ஏவம் ஹீதி ।
க்ருதார்தோ²(அ)ஸ்மீத்யாத்மந்யபி⁴மாநகரம் ஸ்வாநுப⁴வஸித்³த⁴மாத்மஜ்ஞாநம் நாஸ்மாத³ந்யது³த்க்ருஷ்டம் கிஞ்சிதி³த்யேவம் வித்³யாமவதா⁴ரணஶ்ருதி: ஸ்தௌதீத்யர்த²: ।
யதா²ஶ்ருதார்த²த்வே கோ தோ³ஷ: ஸ்யாதி³தி சேத்தத்ரா(அ)(அ)ஹ —
நந்விதி ।
இத்யவதா⁴ரணஶ்ருத்யா விவக்ஷிதமிதி ஶேஷ: ।
தத்ர ஹேது: —
தத்³யோ ய இதி ।
ஸர்வார்த²ஶ்ருதேர்ப்³ரஹ்மவித்³யா ஸர்வார்தா² ஸர்வஸாதா⁴ரணீதி ஶ்ரவணாதி³தி யாவத் ।
ப்³ரஹ்மவித்³யாயா: ஸர்வார்த²த்வே வாக்யஶேஷம் ப்ரமாணத்வேநாவதார்ய வ்யாசஷ்டே —
ததே³வேதி ।
நநு மோக்ஷே ஸ்வர்க³ஶப்³தோ³ ந யுஜ்யதே தஸ்யார்தா²ந்தரே ரூட⁴த்வாத³த ஆஹ —
ஸ்வர்கே³தி ।
யதா² ஜ்யோதிஷ்டோமப்ரகரணே ஶ்ருதோ ஜ்யோதி:ஶப்³தோ³ ஜ்யோதிஷ்டோமவிஷயஸ்ததா² மோக்ஷப்ரகரணே ஶ்ருத: ஸ்வர்க³ஶப்³தோ³ மோக்ஷமதி⁴கரோதி । ரூட்⁴யங்கீ³காரே ப்³ரஹ்மவித்³யாயா நிகர்ஷப்ரஸம்கா³தி³தி பா⁴வ: । ஜீவந்த ஏவ முக்தா: ஸந்த: ஶரீரபாதாதூ³ர்த்⁴வம் மோக்ஷமபியந்தீதி ஸம்ப³ந்த⁴: ॥ 8 ॥