అథేతి హేతూపదేశానన్తర్యప్రదర్శనార్థః । హేతుప్రధానాని హి వాక్యాని అతీతాని । తదనన్తరమ్ ఆగమప్రధానేన ప్రతిజ్ఞాతోఽర్థః నిగమ్యతే మైత్రేయీబ్రాహ్మణేన । హ - శబ్దః వృత్తావద్యోతకః । యాజ్ఞవల్క్యస్య ఋషేః కిల ద్వే భార్యే పత్న్యౌ బభూవతుః ఆస్తామ్ — మైత్రేయీ చ నామత ఎకా, అపరా కాత్యాయనీ నామతః । తయోర్భార్యయోః మైత్రేయీ హ కిల బ్రహ్మవాదినీ బ్రహ్మవదనశీలా బభూవ ఆసీత్ ; స్త్రీప్రజ్ఞా - స్త్రియాం యా ఉచితా సా స్త్రీప్రజ్ఞా — సైవ యస్యాః ప్రజ్ఞా గృహప్రయోజనాన్వేషణాలక్షణా, సా స్త్రీప్రజ్ఞైవ తర్హి తస్మిన్కాలే ఆసీత్ కాత్యాయనీ । అథ ఎవం సతి హ కిల యాజ్ఞవల్క్యః అన్యత్ పూర్వస్మాద్గార్హస్థ్యలక్షణాద్వృత్తాత్ పారివ్రాజ్యలక్షణం వృత్తమ్ ఉపాకరిష్యన్ ఉపాచికీర్షుః సన్ ॥