अद्वैतशारदा | दक्षिणाम्नाय श्रीशारदापीठम्, शृङ्गेरी

ಸ ಯಥಾ ಸೈಂಧವಘನೋಽನಂತರೋಽಬಾಹ್ಯಃ ಕೃತ್ಸ್ನೋ ರಸಘನ ಏವೈವಂ ವಾ ಅರೇಽಯಮಾತ್ಮಾನಂತರೋಽಬಾಹ್ಯಃ ಕೃತ್ಸ್ನಃ ಪ್ರಜ್ಞಾನಘನ ಏವೈತೇಭ್ಯೋ ಭೂತೇಭ್ಯಃ ಸಮುತ್ಥಾಯ ತಾನ್ಯೇವಾನುವಿನಶ್ಯತಿ ನ ಪ್ರೇತ್ಯ ಸಂಜ್ಞಾಸ್ತೀತ್ಯರೇ ಬ್ರವೀಮೀತಿ ಹೋವಾಚ ಯಾಜ್ಞವಲ್ಕ್ಯಃ ॥ ೧೩ ॥

ಸರ್ವಕಾರ್ಯಪ್ರಲಯೇ ವಿದ್ಯಾನಿಮಿತ್ತೇ, ಸೈಂಧವಘನವತ್ ಅನಂತರಃ ಅಬಾಹ್ಯಃ ಕೃತ್ಸ್ನಃ ಪ್ರಜ್ಞಾನಘನ ಏಕ ಆತ್ಮಾ ಅವತಿಷ್ಠತೇ ; ಪೂರ್ವಂ ತು ಭೂತಮಾತ್ರಾಸಂಸರ್ಗವಿಶೇಷಾತ್ ಲಬ್ಧವಿಶೇಷವಿಜ್ಞಾನಃ ಸನ್ ; ತಸ್ಮಿನ್ ಪ್ರವಿಲಾಪಿತೇ ವಿದ್ಯಯಾ ವಿಶೇಷವಿಜ್ಞಾನೇ ತನ್ನಿಮಿತ್ತೇ ಚ ಭೂತಸಂಸರ್ಗೇ ನ ಪ್ರೇತ್ಯ ಸಂಜ್ಞಾ ಅಸ್ತಿ — ಇತ್ಯೇವಂ ಯಾಜ್ಞವಲ್ಕ್ಯೇನೋಕ್ತಾ ॥

ಸರ್ವಕಾರ್ಯೇತಿ ; ಪೂರ್ವಂ ತ್ವಿತಿ ;

ಸ ಯಥಾ ಸೈಂಧವಘನ ಇತ್ಯಾದಿವಾಕ್ಯತಾತ್ಪರ್ಯಮಾಹ —

ಸರ್ವಕಾರ್ಯೇತಿ ।

ಏತೇಭ್ಯೋ ಭೂತೇಭ್ಯ ಇತ್ಯಾದೇರರ್ಥಮಾಹ —

ಪೂರ್ವಂ ತ್ವಿತಿ ।

ಜ್ಞಾನೋದಯಾತ್ಪ್ರಾಗವಸ್ಥಾಯಾಮಿತ್ಯರ್ಥಃ । ಲಬ್ಧವಿಶೇಷವಿಜ್ಞಾನಃ ಸನ್ವ್ಯವಹರತೀತಿ ಶೇಷಃ । ಪ್ರವಿಲಾಪಿತಂ ತಸ್ಯೇತ್ಯಧ್ಯಾಹಾರಃ ॥ ೧೩ ॥