ಸಾ ಹೋವಾಚ ಮೈತ್ರೇಯ್ಯತ್ರೈವ ಮಾ ಭಗವಾನ್ಮೋಹಾಂತಮಾಪೀಪಿಪನ್ನ ವಾ ಅಹಮಿಮಂ ವಿಜಾನಾಮೀತಿ ಸ ಹೋವಾಚ ನ ವಾ ಅರೇಽಹಂ ಮೋಹಂ ಬ್ರವೀಮ್ಯವಿನಾಶೀ ವಾ ಅರೇಽಯಮಾತ್ಮಾನುಚ್ಛಿತ್ತಿಧರ್ಮಾ ॥ ೧೪ ॥
ಸಾ ಹೋವಾಚ — ಅತ್ರೈವ ಮಾ ಭಗವಾನ್ ಏತಸ್ಮಿನ್ನೇವ ವಸ್ತುನಿ ಪ್ರಜ್ಞಾನಘನ ಏವ, ನ ಪ್ರೇತ್ಯ ಸಂಜ್ಞಾಸ್ತೀತಿ, ಮೋಹಾಂತಂ ಮೋಹಮಧ್ಯಮ್ , ಆಪೀಪಿಪತ್ ಆಪೀಪದತ್ ಅವಗಮಿತವಾನಸಿ, ಸಮ್ಮೋಹಿತವಾನಸೀತ್ಯರ್ಥಃ ; ಅತಃ ನ ವಾ ಅಹಮ್ ಇಮಮಾತ್ಮಾನಮ್ ಉಕ್ತಲಕ್ಷಣಂ ವಿಜಾನಾಮಿ ವಿವೇಕತ ಇತಿ । ಸ ಹೋವಾಚ — ನಾಹಂ ಮೋಹಂ ಬ್ರವೀಮಿ, ಅವಿನಾಶೀ ವಾ ಅರೇಽಯಮಾತ್ಮಾ ಯತಃ ; ವಿನನಂ ಶೀಲಮಸ್ಯೇತಿ ವಿನಾಶೀ, ನ ವಿನಾಶೀ ಅವಿನಾಶೀ, ವಿನಾಶಶಬ್ದೇನ ವಿಕ್ರಿಯಾ, ಅವಿನಾಶೀತಿ ಅವಿಕ್ರಿಯ ಆತ್ಮೇತ್ಯರ್ಥಃ ; ಅರೇ ಮೈತ್ರೇಯಿ, ಅಯಮಾತ್ಮಾ ಪ್ರಕೃತಃ ಅನುಚ್ಛಿತ್ತಧರ್ಮಾ ; ಉಚ್ಛಿತ್ತಿರುಚ್ಛೇದಃ, ಉಚ್ಛೇದಃ ಅಂತಃ ವಿನಾಶಃ, ಉಚ್ಛಿತ್ತಿಃ ಧರ್ಮಃ ಅಸ್ಯ ಇತಿ ಉಚ್ಛಿತ್ತಿಧರ್ಮಾ, ನ ಉಚ್ಛಿತ್ತಿಧರ್ಮಾ ಅನುಚ್ಛಿತ್ತಿಧರ್ಮಾ, ನಾಪಿ ವಿಕ್ರಿಯಾಲಕ್ಷಣಃ, ನಾಪ್ಯುಚ್ಛೇದಲಕ್ಷಣಃ ವಿನಾಶಃ ಅಸ್ಯ ವಿದ್ಯತ ಇತ್ಯರ್ಥಃ ॥