ಪ್ರತ್ಯಧ್ಯಾಯಮನ್ಯಥಾಽನ್ಯಥಾ ಪ್ರತಿಪಾದನಾದಾತ್ಮನಃ ಸವಿಶೇಷತ್ವಮಾಶಂಕ್ಯ ಸ ಏಷ ಇತ್ಯಾದೇಸ್ತಾತ್ಪರ್ಯಮಾಹ —
ಚತುರ್ಷ್ವಪೀತಿ ।
ಕೇನ ಪ್ರಕಾರೇಣ ತಸ್ಯ ತುಲ್ಯತ್ವಮಿತ್ಯಾಶಂಕ್ಯಾಽಽಹ —
ಪರಂ ಬ್ರಹ್ಮೇತಿ ।
ಅಧ್ಯಾಯಭೇದಸ್ತರ್ಹಿ ಕಥಮಿತ್ಯಾಶಂಕ್ಯಾಽಽಹ —
ಉಪಾಯೇತಿ ।
ಉಪಾಯಭೇದವದುಪೇಯಭೇದೋಽಪಿ ಸ್ಯಾದಿತ್ಯಾಶಂಕ್ಯಾಽಽಹ —
ಉಪೇಯಸ್ತ್ವಿತಿ ।
ಚಾತುರ್ಥಿಕಾದರ್ಥಾತ್ಪಾಂಚಮಿಕಸ್ಯಾರ್ಥಸ್ಯ ಭೇದಂ ವ್ಯಾವರ್ತಯತಿ —
ಸ ಏವೇತಿ ।
ಪ್ರಾಣಪಣೋಪನ್ಯಾಸೇನ ಮೂರ್ಧಾ ತೇ ವಿಪತಿಷ್ಯತೀತಿ ಮೂರ್ಧಪಾತೋಪನ್ಯಾಸಾತ್ಪ್ರಾಣಾಃ ಪಣತ್ವೇನ ಗೃಹೀತಾ ಇತಿ ಗಮ್ಯತೇ । ತೇನ ಶಾಕಲ್ಯಬ್ರಾಹ್ಮಣೇನ ನಿರ್ವಿಶೇಷಃ ಪ್ರತ್ಯಗಾತ್ಮಾ ನಿರ್ಧಾರಿತ ಇತ್ಯರ್ಥಃ ।
ವಿಜ್ಞಾನಮಾನಂದಂ ಬ್ರಹ್ಮೇತ್ಯಾದಾವುಕ್ತಂ ಸ್ಮಾರಯತಿ —
ಪುನರಿತಿ ।
ಪಂಚಮಸಮಾಪ್ತೌ ಪುನರ್ವಿಜ್ಞಾನಮಿತ್ಯಾದಿನಾ ಸ ಏವ ನಿರ್ಧಾರಿತ ಇತಿ ಯೋಜನಾ ।
ಕೂರ್ಚಬ್ರಾಹ್ಮಣಾದಾವಪಿ ಸ ಏವೋಕ್ತ ಇತ್ಯಾಹ —
ಪುನರ್ಜನಕೇತಿ ।
ಅಸ್ಮಿನ್ನಪಿ ಬ್ರಾಹ್ಮಣೇ ಸ ಏವೋಕ್ತ ಇತ್ಯಾಹ —
ಪುನರಿಹೇತಿ ।
ಕಿಮಿತಿ ಪೂರ್ವತ್ರ ತತ್ರ ತತ್ರೋಕ್ತಸ್ಯ ನಿರ್ವಿಶೇಷಸ್ಯಾಽಽತ್ಮನೋಽವಸಾನೇ ವಚನಮಿತ್ಯಾಶಂಕ್ಯಾಽಽಹ —
ಚತುರ್ಣಾಮಪೀತಿ ।
ಪೌರ್ವಾಪರ್ಯಪರ್ಯಾಲೋಚನಾಯಾಮುಪನಿಷದರ್ಥೋ ನಿರ್ವಿಶೇಷಮಾತ್ಮತತ್ತ್ವಮಿತ್ಯುಪಪಾದ್ಯ ವಾಕ್ಯಾಂತರಮವತಾರ್ಯ ವ್ಯಾಕರೋತಿ —
ಯಸ್ಮಾದಿತ್ಯಾದಿನಾ ।
ಇತಿ ಹೋಕ್ತ್ವೇತ್ಯಾದಿವಾಕ್ಯಮಾಕಾಂಕ್ಷಾಪೂರ್ವಕಮಾದಾಯ ವ್ಯಾಚಷ್ಟೇ —
ಯತ್ಪೃಷ್ಟವತ್ಯಸೀತ್ಯಾದಿನಾ ।
ಬ್ರಾಹ್ಮಣಾರ್ಥಮುಪಸಂಹರತಿ —
ಪರಿಸಮಾಪ್ತೇತಿ ।
ತಥಾಽಪ್ಯುಪದೇಶಾಂತರಂ ಕರ್ತವ್ಯಮಸ್ತೀತ್ಯಾಶಂಕ್ಯಾಽಽಹ —
ಏತಾವಾನಿತಿ ।
ಕಿಮತ್ರ ಪ್ರಮಾಣಮಿತಿ ತದಾಹ —
ಏತದಿತಿ ।
ತಥಾಽಪಿ ಪರಮಾ ನಿಷ್ಠಾ ಸಂನ್ಯಾಸಿನೋ ವಕ್ತವ್ಯೇತಿ ಚೇನ್ನೇತ್ಯಾಹ —
ಏಷೇತಿ ।
ಆತ್ಮಜ್ಞಾನೇ ಸಸಂನ್ಯಾಸೇ ಸತ್ಯಪಿ ಪುರುಷಾರ್ಥಾಂತರಂ ಕರ್ತವ್ಯಮಸ್ತೀತ್ಯಾಶಂಕ್ಯಾಹ —
ಏಷ ಇತಿ ।
ಇತಿಶಬ್ದೋ ಬ್ರಾಹ್ಮಣಸಮಾಪ್ತ್ಯರ್ಥಃ ।