పూర్వస్మిన్నధ్యాయే బ్రహ్మాత్మజ్ఞానం సఫలం సాఙ్గోపాఙ్గం వాదన్యాయేనోక్తమిదానీం కాణ్డాన్తరమవతారయతి —
పూర్ణమితి ।
పూర్వాధ్యాయేష్వేవ సర్వస్య వక్తవ్యస్య సమాప్తత్వాదలం ఖిలకాణ్డారమ్భేణేత్యాశఙ్క్య పూర్వత్రానుక్తం పరిశిష్టం వస్తు ఖిలశబ్దవాచ్యమస్తీత్యాహ —
అధ్యాయచతుష్టయేనేతి ।
సర్వాన్తర ఇత్యుక్త ఇతి శేషః । అమృతత్వసాధనం నిర్ధారితమితి పూర్వేణ సంబన్ధః । శబ్దార్థాదీత్యాదిశబ్దేన మానమేయాదిగ్రహః । దయాం శిక్షేదిత్యుక్తానీతి శేషః ।
ఓఙ్కారాది యత్ర సాధనత్వేన విధిత్సితం తత్పూర్వోక్తమైక్యజ్ఞానమనువదతి —
పూర్ణమితి ।
అవయవార్థముక్త్వా సముదాయార్థమాహ —
తత్సంపూర్ణమితి ।
అదః పూర్ణమిత్యనేన లక్ష్యం తత్పదార్థం దర్శయిత్వా త్వమ్పదార్థం దర్శయతి —
తదేవేతి ।
కథం సోపాధికస్య పూర్ణత్వమిత్యాశఙ్క్యాఽఽహ —
స్వేనేతి ।
వ్యావర్త్యమాహ —
నోపాధీతి ।
న వయముపహితేన విశిష్టేన రూపేణ పూర్ణతాం వర్ణయామః కిన్తు కేవలేన స్వరూపేణేత్యర్థః ।
లక్ష్యౌ తత్త్వమ్పదార్థముక్త్వా తావేవ వాచ్యౌ కథయతి —
తదిదమితి ।
కథం కార్యాత్మనోద్రిచ్యమానస్య పూర్ణత్వమిత్యాశఙ్క్యాఽఽహ —
యద్యపీతి ।
లక్ష్యపదార్థైక్యజ్ఞానఫలముపన్యస్యతి —
పూర్ణస్యేతి ।
ఉపక్రమోపసంహారయోరైకరూప్యమైక్యే శ్రుతితాత్పర్యలిఙ్గం సంగిరతే —
యదుక్తమితి ।
కథం పూర్ణకణ్డికాయా బ్రహ్మకణ్డికయా సహైకార్థత్వేనైకవాక్యత్వమిత్యాశఙ్క్య తద్వ్యుత్పాదయతి —
తత్రేత్యాదినా ।
ఉపక్రమోపసంహారసిద్ధే బ్రహ్మాత్మైక్యే కఠశ్రుతిం సంవాదయతి —
తథా చేతి ।
బ్రహ్మాత్మనోరైక్యముక్తముపజీవ్య వాక్యార్థమాహ —
అత ఇతి ।
పూర్ణం యద్బ్రహ్మేతి యచ్ఛబ్దో ద్రష్టవ్యః ।
ఉక్తమేవ వ్యనక్తి —
తస్మాదేవేతి ।
సంసారావస్థాం దర్శయిత్వా మోక్షావస్థాం దర్శయతి —
యద్యదాత్మానమితి ।
ఉక్తే విద్యాఫలే వాక్యోపక్రమమనుకూలయతి —
తథా చోక్తమితి ।
న కేవలం బ్రహ్మకణ్డికయైవాస్య మన్త్రస్యైకవాక్యత్వం కిం తు సర్వాభిరుపనిషద్భిరిత్యాహ —
యః సర్వోపనిషదర్థ ఇతి ।
అనువాదఫలమాహ —
ఉత్తరేతి ।
తదేవ స్ఫుటయతి —
బ్రహ్మవిద్యేతి ।
తస్మాద్యుక్తో బ్రహ్మణోఽనువాద ఇతి శేషః ।
కథం తర్హి సర్వోపాసనశేషత్వేన విధిత్సితత్వమోఙ్కారాదీనాముక్తమత ఆహ —
ఖిలేతి ।