అధునా దమాదిసాధనత్రయవిధానార్థోఽయమారమ్భః — త్రయాః, త్రిసఙ్ఖ్యాకాః ప్రాజాపత్యాః ప్రజాపతేరపత్యాని ప్రాజాపత్యాః, తే కిమ్ ? ప్రజాపతౌ పితరి బ్రహ్మచర్యం శిష్యత్వవృత్తేర్బ్రహ్మచర్యస్య ప్రాధాన్యాత్ శిష్యాః సన్తో బ్రహ్మచర్యమ్ ఊషుః ఉషితవన్త ఇత్యర్థః । కే తే ? విశేషతః దేవా మనుష్యా అసురాశ్చ । తే చ ఉషిత్వా బ్రహ్మచర్యం కిమకుర్వన్నిత్యుచ్యతే — తేషాం దేవా ఊచుః పితరం ప్రజాపతిమ్ । కిమితి ? బ్రవీతు కథయతు, నః అస్మభ్యమ్ యదనుశాసనం భవానితి । తేభ్యః ఎవమర్థిభ్యః హ ఎతదక్షరం వర్ణమాత్రమ్ ఉవాచ — ద ఇతి । ఉక్త్వా చ తాన్ పప్రచ్ఛ పితా — కిం వ్యజ్ఞాసిష్టా౩ ఇతి, మయా ఉపదేశార్థమభిహితస్యాక్షరస్య అర్థం విజ్ఞాతవన్తః ఆహోస్విన్నేతి । దేవా ఊచుః — వ్యజ్ఞాసిష్మేతి, విజ్ఞాతవన్తో వయమ్ । యద్యేవమ్ , ఉచ్యతాం కిం మయోక్తమితి । దేవా ఊచుః — దామ్యత, అదాన్తా యూయం స్వభావతః అతో దాన్తా భవతేతి నః అస్మాన్ ఆత్థ కథయసి । ఇతర ఆహ — ఓమితి సమ్యగ్వ్యజ్ఞాసిష్టేతి ॥