తత్ర యః, అసౌ కః ? యః ఎషః ఎతస్మిన్మణ్డలే పురుషః సత్యనామా ; తస్య వ్యాహృతయః అవయవాః ; కథమ్ ? భూరితి యేయం వ్యాహృతిః, సా తస్య శిరః, ప్రాథమ్యాత్ ; తత్ర సామాన్యం స్వయమేవాహ శ్రుతిః — ఎకమ్ ఎకసఙ్ఖ్యాయుక్తం శిరః, తథా ఎతత్ అక్షరమ్ ఎకం భూరితి । భువ ఇతి బాహూ, ద్విత్వసామాన్యాత్ ; ద్వౌ బాహూ, ద్వే ఎతే అక్షరే । తథా స్వరితి ప్రతిష్ఠా ; ద్వే ప్రతిష్ఠే ద్వే ఎతే అక్షరే ; ప్రతిష్ఠే పాదౌ ప్రతితిష్ఠత్యాభ్యామితి । తస్యాస్య వ్యాహృత్యవయవస్య సత్యస్య బ్రహ్మణ ఉపనిషత్ రహస్యమ్ అభిధానమ్ , యేనాభిధానేన అభిధీయమానం తద్బ్రహ్మ అభిముఖీ భవతి లోకవత్ ; కాసావిత్యాహ — అహరితి ; అహరితి చైతత్ రూపం హన్తేర్జహాతేశ్చేతి యో వేద, స హన్తి జహాతి చ పాప్మానం య ఎవం వేద ॥