अद्वैतशारदा | दक्षिणाम्नाय श्रीशारदापीठम्, शृङ्गेरी

ಯಜುಃ ಪ್ರಾಣೋ ವೈ ಯಜುಃ ಪ್ರಾಣೇ ಹೀಮಾನಿ ಸರ್ವಾಣಿ ಭೂತಾನಿ ಯುಜ್ಯಂತೇ ಯುಜ್ಯಂತೇ ಹಾಸ್ಮೈ ಸರ್ವಾಣಿ ಭೂತಾನಿ ಶ್ರೈಷ್ಠ್ಯಾಯ ಯಜುಷಃ ಸಾಯುಜ್ಯಂ ಸಲೋಕತಾಂ ಜಯತಿ ಯ ಏವಂ ವೇದ ॥ ೨ ॥

ಯಜುರಿತಿ ಚೋಪಾಸೀತ ಪ್ರಾಣಮ್ ; ಪ್ರಾಣೋ ವೈ ಯಜುಃ ; ಕಥಂ ಯಜುಃ ಪ್ರಾಣಃ ? ಪ್ರಾಣೇ ಹಿ ಯಸ್ಮಾತ್ ಸರ್ವಾಣಿ ಭೂತಾನಿ ಯುಜ್ಯಂತೇ ; ನ ಹಿ ಅಸತಿ ಪ್ರಾಣೇ ಕೇನಚಿತ್ ಕಸ್ಯಚಿತ್ ಯೋಗಸಾಮರ್ಥ್ಯಮ್ ; ಅತೋ ಯುನಕ್ತೀತಿ ಪ್ರಾಣೋ ಯಜುಃ । ಏವಂವಿದಃ ಫಲಮಾಹ — ಯುಜ್ಯಂತೇ ಉದ್ಯಚ್ಛಂತೇ ಇತ್ಯರ್ಥಃ, ಹ ಅಸ್ಮೈ ಏವಂವಿದೇ, ಸರ್ವಾಣಿ ಭೂತಾನಿ, ಶ್ರೈಷ್ಠ್ಯಂ ಶ್ರೇಷ್ಠಭಾವಃ ತಸ್ಮೈ ಶ್ರೈಷ್ಠ್ಯಾಯ ಶ್ರೇಷ್ಠಭಾವಾಯ, ಅಯಂ ನಃ ಶ್ರೇಷ್ಠೋ ಭವೇದಿತಿ ; ಯಜುಷಃ ಪ್ರಾಣಸ್ಯ ಸಾಯುಜ್ಯಮಿತ್ಯಾದಿ ಸರ್ವಂ ಸಮಾನಮ್ ॥

ಕಥಮಿತ್ಯಾದಿನಾ ; ನ ಹೀತಿ ; ಅತ ಇತಿ ॥೨॥ ;

ಯಜುಃಶಬ್ದಸ್ಯಾನ್ಯತ್ರ ರೂಢತ್ವಾದಯುಕ್ತಂ ಪ್ರಾಣವಿಷಯತ್ವಮಿತಿ ಶಂಕಿತ್ವಾ ಪರಿಹರತಿ —

ಕಥಮಿತ್ಯಾದಿನಾ ।

ಅಸತ್ಯಪಿ ಪ್ರಾಣೇ ಯೋಗಃ ಸಂಭವತೀತ್ಯಾಶಂಕ್ಯಾಽಽಹ —

ನ ಹೀತಿ ।

ಪ್ರಕರಣಾನುಗೃಹೀತಪ್ರಾಣಶಬ್ದಶ್ರುತ್ಯಾ ಯಜುಃಶಬ್ದಸ್ಯ ರೂಢಿಂ ತ್ಯಕ್ತ್ವಾ ಯೋಗೋಽಂಗೀಕ್ರಿಯತ ಇತ್ಯಾಹ —

ಅತ ಇತಿ ॥೨॥