ಯೋ ಹ ವೈ ವಸಿಷ್ಠಾಂ ವೇದ ವಸಿಷ್ಠಃ ಸ್ವಾನಾಂ ಭವತಿ । ತದ್ದರ್ಶನಾನುರೂಪ್ಯೇಣ ಫಲಮ್ । ಯೇಷಾಂ ಚ ಜ್ಞಾತಿವ್ಯತಿರೇಕೇಣ ವಸಿಷ್ಠೋ ಭವಿತುಮಿಚ್ಛತಿ, ತೇಷಾಂ ಚ ವಸಿಷ್ಠೋ ಭವತಿ । ಉಚ್ಯತಾಂ ತರ್ಹಿ, ಕಾಸೌ ವಸಿಷ್ಠೇತಿ ; ವಾಗ್ವೈ ವಸಿಷ್ಠಾ ; ವಾಸಯತ್ಯತಿಶಯೇನ ವಸ್ತೇ ವೇತಿ ವಸಿಷ್ಠಾ ; ವಾಗ್ಗ್ಮಿನೋ ಹಿ ಧನವಂತೋ ವಸಂತ್ಯತಿಶಯೇನ ; ಆಚ್ಛಾದನಾರ್ಥಸ್ಯ ವಾ ವಸೇರ್ವಸಿಷ್ಠಾ ; ಅಭಿಭವಂತಿ ಹಿ ವಾಚಾ ವಾಗ್ಗ್ಮಿನಃ ಅನ್ಯಾನ್ । ತೇನ ವಸಿಷ್ಠಗುಣವತ್ಪರಿಜ್ಞಾನಾತ್ ವಸಿಷ್ಠಗುಣೋ ಭವತೀತಿ ದರ್ಶನಾನುರೂಪಂ ಫಲಮ್ ॥