ಓಂಕಾರೋ ದಮಾದಿತ್ರಯಂ ಬ್ರಹ್ಮಾಬ್ರಹ್ಮೋಪಾಸನಾನಿ ತತ್ಫಲಂ ತದರ್ಥಾ ಗತಿರಾದಿತ್ಯಾದ್ಯುಪಸ್ಥಾನಮಿತ್ಯೇಷೋಽರ್ಥಃ ಸಪ್ತಮೇ ನಿವೃತ್ತಃ । ಸಂಪ್ರತಿ ಪ್ರಾಧಾನ್ಯೇನಾಬ್ರಹ್ಮೋಪಾಸನಂ ಸಫಲಂ ಶ್ರೀಮಂಥಾದಿಕರ್ಮ ಚ ವಕ್ತವ್ಯಮಿತ್ಯಷ್ಟಮಮಧ್ಯಾಯಮಾರಭಮಾಣೋ ಬ್ರಾಹ್ಮಣಸಂಗತಿಮಾಹ —
ಪ್ರಾಣ ಇತಿ ।
ತಸ್ಮಾತ್ಪ್ರಾಣೋ ಗಾಯತ್ರೀತಿ ಯುಕ್ತಮುಕ್ತಮಿತಿ ಶೇಷಃ ।
ಪ್ರಾಣಸ್ಯ ಜ್ಯೇಷ್ಠತ್ವಾದಿ ನಾದ್ಯಾಪಿ ನಿರ್ಧಾರಿತಮಿತಿ ಶಂಕಿತ್ವಾ ಪರಿಹರತಿ —
ಕಥಮಿತ್ಯಾದಿನಾ ।
ಪ್ರಕಾರಾಂತರೇಣ ಪೂರ್ವೋತ್ತರಗ್ರಂಥಸಂಗತಿಮಾಹ —
ಅಥವೇತಿ ।
ಆದಿಶಬ್ದಾದನ್ನವೈಶಿಷ್ಟ್ಯಾದಿನಿರ್ದೇಶಃ । ತತ್ರೇತಿ ಪ್ರಾಣಸ್ಯೈವ ವಿಶಿಷ್ಟಗುಣಕಸ್ಯೋಪಾಸ್ಯತ್ವೋಕ್ತಿಃ । ಹೇತುರ್ಜ್ಯೇಷ್ಠತ್ವಾದಿಸ್ತನ್ಮಾತ್ರಮಿಹಾನಂತರಗ್ರಂಥೇ ಕಥ್ಯತ ಇತಿ ಶೇಷಃ ।
ತದೇವಂ ಪೂರ್ವಗ್ರಂಥಸ್ಯ ಹೇತುಮತ್ತ್ವಾದುತ್ತರಸ್ಯ ಚ ಹೇತುತ್ವಾದಾನಂತರ್ಯೇಣ ಪೌರ್ವಾಪರ್ಯೇಣ ಪೂರ್ವಗ್ರಂಥೇನ ಸಹೋತ್ತರಗ್ರಂಥಜಾತಂ ಸಂಬಧ್ಯತ ಇತಿ ಫಲಿತಮಾಹ —
ಆನಂತರ್ಯೇಣೇತಿ ।
ವಕ್ಷ್ಯಮಾಣಪ್ರಾಣೋಪಾಸನಸ್ಯ ಪೂರ್ವೋಕ್ತೋಕ್ಥಾದ್ಯುಪಾಸ್ತಿಶೇಷತ್ವಮಾಶಂಕ್ಯ ಗುಣಭೇದಾತ್ಫಲಭೇದಾಚ್ಚ ನೈವಮಿತ್ಯಭಿಪ್ರೇತ್ಯಾಽಽಹ —
ನ ಪುನರಿತಿ ।
ಕಿಮಿತಿ ಪ್ರಾಣೋಪಾಸನಮಿಹ ಸ್ವತಂತ್ರಮುಪದಿಶ್ಯತೇ ತತ್ರಾಽಽಹ —
ಖಿಲತ್ವಾದಿತಿ ।
ಇತಿಶಬ್ದೋ ಬ್ರಾಹ್ಮಣಾರಂಭೋಪಸಂಹಾರಾರ್ಥಃ ।
ಏವಂ ಬ್ರಾಹ್ಮಣಾರಂಭಂ ಪ್ರತಿಪಾದ್ಯಾಕ್ಷರಾಣಿ ವ್ಯಾಚಷ್ಟೇ —
ಯಃ ಕಶ್ಚಿದಿತ್ಯಾದಿನಾ ।
ಯಚ್ಛಬ್ದಸ್ಯ ಪುನರುಪಾದಾನಮನ್ವಯಾರ್ಥಮ್ ।
ನಿಪಾತಯೋರರ್ಥಮವಧಾರಣಮೇವ ಪ್ರಾಗುಕ್ತಂ ಪ್ರಕಟಯತಿ —
ಭವತ್ಯೇವೇತಿ ।
ಪ್ರಶ್ನಾಯ ಕೋಽಸೌ ಜ್ಯೇಷ್ಠಶ್ಚ ಶ್ರೇಷ್ಠಶ್ಚೇತಿ ಪ್ರಶ್ನಸ್ತದರ್ಥಮಿತಿ ಯಾವತ್ ।
ಪ್ರಾಣಸ್ಯ ಜ್ಯೇಷ್ಠತ್ವಾದಿಕಮಾಕ್ಷಿಪತಿ —
ಕಥಮಿತಿ ।
ತತ್ರ ಹೇತುಮಾಹ —
ಯಸ್ಮಾದಿತಿ ।
ತಸ್ಮಾಜ್ಜ್ಯೇಷ್ಠತ್ವಾದಿಕಂ ತುಲ್ಯಮೇವೇತಿ ಶೇಷಃ ।
ಸಂಬಂಧಾವಿಶೇಷಮಂಗೀಕೃತ್ಯ ಜ್ಯೇಷ್ಠತ್ವಂ ಪ್ರಾಣಸ್ಯ ಸಾಧಯತಿ —
ತಥಾಽಪೀತಿ ।
ಉಕ್ತಮೇವ ಸಮರ್ಥಯತೇ —
ನಿಷೇಕಕಾಲಾದಿತಿ ।
ತತ್ರಾಪಿ ವಿಪ್ರತಿಪನ್ನಂ ಪ್ರತ್ಯಾಹ —
ಪ್ರಾಣೇ ಹೀತಿ ।
ಜ್ಯೇಷ್ಠತ್ವೇನೈವ ಶ್ರೇಷ್ಠತ್ವೇ ಸಿದ್ಧೇ ಕಿಮಿತಿ ಪುನರುಕ್ತಿರಿತ್ಯಾಶಂಕ್ಯಾಽಽಹ —
ಭವತಿ ತ್ವಿತಿ ।
ಜ್ಯೇಷ್ಠತ್ವೇ ಸತ್ಯಪಿ ಶ್ರೇಷ್ಠತ್ವಾಭಾವಮುಕ್ತ್ವಾ ತಸ್ಮಿನ್ಸತ್ಯಪಿ ಜ್ಯೇಷ್ಠತ್ವಾಭಾವಮಾಹ —
ಮಧ್ಯಮ ಇತಿ ।
ಇಹೇತಿ ಪ್ರಾಣೋಕ್ತಿಃ ।
ಪ್ರಾಣಶ್ರೇಷ್ಠತ್ವೇ ಪ್ರಮಾಣಾಭಾವಮಾಶಂಕ್ಯ ಪ್ರತ್ಯಾಹ —
ಕಥಮಿತ್ಯಾದಿನಾ ।
ಪೂರ್ವೋಕ್ತಮುಪಾಸ್ತಿಫಲಮುಪಸಂಹರತಿ —
ಸರ್ವಥಾಽಪೀತಿ ।
ಆರೋಪೇಣಾನಾರೋಪೇಣ ವೇತ್ಯರ್ಥಃ ।
ಜ್ಯೇಷ್ಠಸ್ಯ ವಿದ್ಯಾಫಲತ್ತ್ವಮಾಕ್ಷಿಪತಿ —
ನನ್ವಿತಿ ।
ತಸ್ಯ ವಿದ್ಯಾಫಲತ್ವಂ ಸಾಧಯತಿ —
ಉಚ್ಯತ ಇತಿ ।
ಇಚ್ಛಾತೋ ಜ್ಯೈಷ್ಠ್ಯಂ ದುಃಸಾಧ್ಯಮಿತಿ ದೋಷಸ್ಯಾಸತ್ತ್ವಮಾಹ —
ನೇತಿ ।
ತತ್ರ ಹೇತುಮಾಹ —
ಪ್ರಾಣವದಿತಿ ।
ಯಥಾ ಪ್ರಾಣಕೃತಾಶನಾದಿಪ್ರಯುಕ್ತಶ್ಚಕ್ಷುರಾದೀನಾಂ ವೃತ್ತಿಲಾಭಸ್ತಥಾ ಪ್ರಾಣೋಪಾಸಕಾಧೀನಂ ಜೀವನಮನ್ಯೇಷಾಂ ಸ್ವಾನಾಂ ಚ ಭವತೀತಿ ಪ್ರಾಣದರ್ಶಿನೋ ಜ್ಯೇಷ್ಠತ್ವಂ ನ ವಯೋನಿಬಂಧನಮಿತ್ಯರ್ಥಃ ॥೧॥