వసిష్ఠత్వమపి ప్రాణస్యైవేతి వక్తుముత్తరవాక్యముత్థాప్య వ్యాచష్టే —
యో హేత్యాదినా ।
ఫలేన ప్రలోభితం శిష్యం ప్రశ్నాభిముఖం ప్రత్యాహ —
ఉచ్యతామిత్యాదినా ।
వాచో వసిష్ఠత్వం ద్విధా ప్రతిజానీతే —
వాసయతీతి ।
వాసయత్యతిశయేనేత్యుక్తం విశదయతి —
వాగ్గ్మినో హీతి ।
వాసయన్తి చేతి ద్రష్టవ్యమ్ ।
వస్తే వేత్యుక్తం స్ఫుటయతి —
ఆచ్ఛాదనార్థస్య వేతి ।
ఆచ్ఛాదనార్థత్వమనుభవేన సాధయతి —
అభిభవన్తీతి ।
ఉక్తముపాస్తిఫలం నిగమయతి —
తేనేతి ॥౨॥