ப்³ராஹ்மணாந்தரமாதா³ய தஸ்ய பூர்வேண ஸம்ப³ந்த⁴ம் ப்ரதிஜாநீதே —
ஶ்வேதகேதுரிதி ।
கோ(அ)ஸௌ ஸம்ப³ந்த⁴ஸ்தமாஹ —
கி²லேதி ।
தத்ர கர்மகாண்டே³ ஜ்ஞாநகாண்டே³ வா யத்³வஸ்து ப்ராதா⁴ந்யேந நோக்தம் தத³ஸ்மிந்காண்டே³ வக்தவ்யமஸ்ய கி²லாதி⁴காரத்வாத்ததா² ச பூர்வமநுக்தம் வக்துமித³ம் ப்³ராஹ்மணமித்யர்த²: ।
வக்தவ்யஶேஷம் த³ர்ஶயிதும் வ்ருத்தம் கீர்தயதி —
ஸப்தமேதி ।
ஸமுச்சயகாரிணோ முமூர்ஷோரக்³நிப்ரார்த²நே(அ)பி கிம் ஸ்யாதி³த்யாஶங்க்யா(அ)(அ)ஹ —
தத்ரேதி ।
அத்⁴யாயாவஸாநம் ஸப்தம்யர்த²: ।
ஸாமர்த்²யமேவ த³ர்ஶயதி —
ஸுபதே²தீதி ।
விஶேஷணவஶாத்³ப³ஹவோ மார்கா³ பா⁴ந்து கிம் புநஸ்தேஷாம் ஸ்வரூபம் ததா³ஹ —
பந்தா²நஶ்சேதி ।
தத்ர வாக்யஶேஷமநுகூலயதி —
வக்ஷ்யதி சேதி ।
ஸம்ப்ரத்யாகாங்க்ஷாத்³வாரா ஸமநந்தரப்³ராஹ்மணதாத்பர்யமாஹ —
தத்ரேதி ।
உபஸம்ஹ்ரியமாணாம் ஸம்ஸாரக³திமேவ பரிச்சி²நத்தி —
ஏதாவதீ ஹீதி ।
த³க்ஷிணோத³க³தோ⁴க³த்யாத்மிகேதி யாவத் ।
கர்மவிபாகஸ்தர்ஹி குத்ரோபஸம்ஹ்ரியதே தத்ரா(அ)(அ)ஹ —
ஏதாவாநிதி ।
இதிஶப்³தோ³ யதோ²க்தஸம்ஸாரக³த்யதிரிக்தகர்மவிபாகாபா⁴வாத்தது³பஸம்ஹாரார்த² ஏவாயமாரம்ப⁴ இத்யுபஸம்ஹாரார்த²: ।
அதோ²த்³கீ³தா²தி⁴காரே ஸர்வோ(அ)பி கர்மவிபாகோ(அ)நர்த² ஏவேத்யுக்தத்வாத்பரிஶிஷ்டஸம்ஸாரக³த்யபா⁴வாத்கத²ம் கி²லகாண்டே³ தந்நிர்தே³ஶஸித்³தி⁴ரத ஆஹ —
யத்³யபீதி ।
கஸ்தர்ஹி விபாகஸ்தத்ரோக்தஸ்தத்ரா(அ)(அ)ஹ —
ஶாஸ்த்ரீயஸ்யேதி ।
தத்ர ஸுக்ருதவிபாகஸ்யைவோபந்யாஸே ஹேதுமாஹ —
ப்³ரஹ்மவித்³யேதி ।
அநிஷ்டவிபாகாத்து வைராக்³யம் ஸுக்ருதாபி⁴முக்²யாதே³வ ஸித்³த⁴மிதி ந தத்ர தத்³விவக்ஷா । இஹ புந: ஶாஸ்த்ரஸமாப்தௌ கி²லாதி⁴காரே தத்³விபாகோ(அ)ப்யுபஸம்ஹ்ரியத இதி பா⁴வ: ।
ப்ரகாராந்தரேண ஸம்க³திம் வக்துமுக்தம் ஸ்மாரயதி —
தத்ராபீதி ।
ஶாஸ்த்ரீயவிபாகவிஷயே(அ)பீத்யர்த²: ।
உத்தரக்³ரந்த²ஸ்ய விஷயபரிஶேஷார்த²ம் பாதநிகாமாஹ —
தத்ரேதி ।
லோகத்³வயம் ஸப்தம்யர்த²: ।
ப்ராக³நுக்தமபி தே³வயாநாத்³யத்ர வக்தவ்யமிதி குதோ நியமஸித்³தி⁴ஸ்தத்ரா(அ)(அ)ஹ —
தச்சேதி ।
வக்தவ்யஶேஷஸ்ய ஸத்த்வே ப²லிதமாஹ —
இத்யத இதி ।
யத்தர்ஹி ப்ராக³நுக்தம் தத்³தே³வயாநாதி³ வக்தவ்யம் ப்ராகே³வோக்தம் து ப்³ரஹ்மலோகாதி³ கஸ்மாது³ச்யதே தத்ரா(அ)(அ)ஹ —
அந்தே சேதி ।
ஶாஸ்த்ரஸ்யாந்தே சேதி ஸம்ப³ந்த⁴: ।
இதஶ்சேத³ம் ப்³ராஹ்மணமக³தார்த²த்வாதா³ரப்⁴யமித்யாஹ —
அபி சேதி ।
ஏதாவதி³த்யாத்மஜ்ஞாநோக்தி: । அம்ருதத்வம் தத்ஸாத⁴நமிதி யாவத் । சகாராது³க்தமித்யநுஷங்க³: । ஜ்ஞாநமேவாம்ருதத்வே ஹேதுரித்யுக்தோ(அ)ர்த²ஸ்தத்ரேதி ஸப்தம்யர்த²: தத³ர்தோ² ஹேத்வபதே³ஶார்த²: ।
கத²ம் புநர்வக்ஷ்யமாணா கர்மக³திர்ஜ்ஞாநமேவாம்ருதத்வஸாத⁴நமித்யத்ர ஹேதுத்வம் ப்ரதிபத்³யதே தத்ரா(அ)(அ)ஹ —
யஸ்மாதி³தி ।
வ்யாபாரோ(அ)ஸ்தி கர்மண இதி ஶேஷ: । ஸாமர்த்²யாஜ்ஜ்ஞாநாதிரிக்தஸ்யோபாயஸ்ய ஸம்ஸாரஹேதுத்வநியமாதி³த்யர்த²: ।
ப்ரகாராந்தரேண ப்³ராஹ்மணதாத்பர்யம் வக்துமக்³நிஹோத்ரவிஷயே ஜநகயாஜ்ஞவல்க்யஸம்வாத³ஸித்³த⁴மர்த²மநுவத³தி —
அபி சேத்யாதி³நா ।
ஏதயோரக்³நிஹோத்ராஹுத்யோ: ஸாயம் ப்ராதஶ்சாநுஷ்டி²தயோரிதி யாவத் । லோகம் ப்ரத்யுத்தா²யிநம் யஜமாநம் பரிவேஷ்ட்யேமம் லோகம் ப்ரத்யாவ்ருத்தயோஸ்தயோரநுஷ்டா²நோபசிதயோ: பரலோகம் ப்ரதி ஸ்வாஶ்ரயோத்தா²நஹேதும் பரிணாமமித்யேததி³தி ப்ரஶ்நஷட்கமக்³நிஹோத்ரவிஷயே ஜநகேந யாஜ்ஞவல்க்யம் ப்ரத்யுக்தமிதி ஸம்ப³ந்த⁴: । தத்ரேத்யாக்ஷேபக³தப்ரஶ்நஷட்கோக்தி: ।
நநு ப²லவதோ(அ)ஶ்ரவணாத்கஸ்யேத³மாஹுதிப²லம் ந ஹி தத்ஸ்வதந்த்ரம் ஸம்ப⁴வதி தத்ரா(அ)(அ)ஹ —
தச்சேதி ।
கர்த்ருவாசிபதா³பா⁴வாதா³ஹுத்யபூர்வஸ்யைவோத்க்ராந்த்யாதி³கர்யாரம்ப⁴கத்வாந்ந தத்ர கர்த்ருகா³மிகப²லமுக்தமித்யாஶங்க்யா(அ)(அ)ஹ —
ந ஹீதி ।
கிஞ்ச காரகாஶ்ரயவத்த்வாத்கர்மணோ யுக்தம் தத்ப²லஸ்ய கர்த்ருகா³மித்வமித்யாஹ —
ஸாத⁴நேதி ।
ஸ்வாதந்த்ர்யாஸம்ப⁴வாதா³ஹுத்யோ: ஸ்வகர்த்ருகயோரேவமித்யாதி³ விவக்ஷிதம் சேத்தர்ஹி கத²ம் தத்ர கேவலாஹுத்யோர்க³த்யாதி³ க³ம்யதே தத்ரா(அ)(அ)ஹ —
தத்ரேதி ।
அக்³நிஹோத்ரப்ரகரணம் ஸப்தம்யர்த²: । அக்³நிஹோத்ரஸ்துத்யர்த²த்வாத்ப்ரஶ்நப்ரதிவசநரூபஸ்ய ஸந்த³ர்ப⁴ஸ்யேதி ஶேஷ: ।
ப⁴வத்வேவமக்³நிஹோத்ரப்ரகரணஸ்தி²தி: ப்ரக்ருதே து கிமாயாதம் தத்ரா(அ)(அ)ஹ —
இஹ த்விதி ।
கிமிதி வித்³யாப்ரகரணே கர்மப²லவிஜ்ஞாநம் விவக்ஷ்யதே தத்ரா(அ)(அ)ஹ —
தத்³த்³வாரேணேதி ।
ப்³ராஹ்மணாரம்ப⁴முபபாதி³தமுபஸம்ஹரதி —
ஏவமிதி ।
ஸம்ஸாரக³த்யுபஸம்ஹாரேண கர்மவிபாகஸ்ய ஸர்வஸ்யைவோபஸம்ஹார: ஸித்³தோ⁴ ப⁴வதி தத³திரிக்ததத்³விபாகாபா⁴வாதி³த்யாஹ —
கர்மகாண்ட³ஸ்யேதி ।
யதோ²க்தம் வஸ்து த³ர்ஶயிதும் ப்³ராஹ்மணமாரப⁴தே சேத்தத்ர கிமித்யாக்²யாயிகா ப்ரணீயதே தத்ரா(அ)(அ)ஹ —
இத்யேதத்³த்³வயமிதி ।
ஸர்வமேவ பூர்வோக்தம் வஸ்து த³ர்ஶயிதுமிச்ச²ந்வேத³: ஸுகா²வபோ³தா⁴ர்த²மாக்²யாயிகாம் கரோதீத்யர்த²: ।