ಸ ಹೋವಾಚ ತಥಾ ನಸ್ತ್ವಂ ತಾತ ಜಾನೀಥಾ ಯಥಾ ಯದಹಂ ಕಿಂಚ ವೇದ ಸರ್ವಮಹಂ ತತ್ತುಭ್ಯಮವೋಚಂ ಪ್ರೇಹಿ ತು ತತ್ರ ಪ್ರತೀತ್ಯ ಬ್ರಹ್ಮಚರ್ಯಂ ವತ್ಸ್ಯಾವ ಇತಿ ಭವಾನೇವ ಗಚ್ಛತ್ವಿತಿ ಸ ಆಜಗಾಮ ಗೌತಮೋ ಯತ್ರ ಪ್ರವಾಹಣಸ್ಯ ಜೈವಲೇರಾಸ ತಸ್ಮಾ ಆಸನಮಾಹೃತ್ಯೋದಕಮಾಹಾರಯಾಂಚಕಾರಾಥ ಹಾಸ್ಮಾ ಅರ್ಘ್ಯಂ ಚಕಾರ ತಂ ಹೋವಾಚ ವರಂ ಭಗವತೇ ಗೌತಮಾಯ ದದ್ಮ ಇತಿ ॥ ೪ ॥
ಸ ಹೋವಾಚ ಪಿತಾ ಪುತ್ರಂ ಕ್ರುದ್ಧಮುಪಶಮಯನ್ — ತಥಾ ತೇನ ಪ್ರಕಾರೇಣ ನಃ ಅಸ್ಮಾನ್ ತ್ವಮ್ , ಹೇ ತಾತ ವತ್ಸ, ಜಾನೀಥಾ ಗೃಹ್ಣೀಥಾಃ, ಯಥಾ ಯದಹಂ ಕಿಂಚ ವಿಜ್ಞಾನಜಾತಂ ವೇದ ಸರ್ವಂ ತತ್ ತುಭ್ಯಮ್ ಅವೋಚಮ್ ಇತ್ಯೇವ ಜಾನೀಥಾಃ ; ಕೋಽನ್ಯೋ ಮಮ ಪ್ರಿಯತರೋಽಸ್ತಿ ತ್ವತ್ತಃ, ಯದರ್ಥಂ ರಕ್ಷಿಷ್ಯೇ ; ಅಹಮಪಿ ಏತತ್ ನ ಜಾನಾಮಿ, ಯತ್ ರಾಜ್ಞಾ ಪೃಷ್ಟಮ್ ; ತಸ್ಮಾತ್ ಪ್ರೇಹಿ ಆಗಚ್ಛ ; ತತ್ರ ಪ್ರತೀತ್ಯ ಗತ್ವಾ ರಾಜ್ಞಿ ಬ್ರಹ್ಮಚರ್ಯಂ ವತ್ಸ್ಯಾವೋ ವಿದ್ಯಾರ್ಥಮಿತಿ । ಸ ಆಹ — ಭವಾನೇವ ಗಚ್ಛತ್ವಿತಿ, ನಾಹಂ ತಸ್ಯ ಮುಖಂ ನಿರೀಕ್ಷಿತುಮುತ್ಸಹೇ । ಸ ಆಜಗಾಮ, ಗೌತಮಃ ಗೋತ್ರತೋ ಗೌತಮಃ, ಆರುಣಿಃ, ಯತ್ರ ಪ್ರವಾಹಣಸ್ಯ ಜೈವಲೇರಾಸ ಆಸನಮ್ ಆಸ್ಥಾಯಿಕಾ ; ಷಷ್ಠೀದ್ವಯಂ ಪ್ರಥಮಾಸ್ಥಾನೇ ; ತಸ್ಮೈ ಗೌತಮಾಯ ಆಗತಾಯ ಆಸನಮ್ ಅನುರೂಪಮ್ ಆಹೃತ್ಯ ಉದಕಂ ಭೃತ್ಯೈರಾಹಾರಯಾಂಚಕಾರ ; ಅಥ ಹ ಅಸ್ಮೈ ಅರ್ಘ್ಯಂ ಪುರೋಧಸಾ ಕೃತವಾನ್ ಮಂತ್ರವತ್ , ಮಧುಪರ್ಕಂ ಚ । ಕೃತ್ವಾ ಚೈವಂ ಪೂಜಾಂ ತಂ ಹೋವಾಚ — ವರಂ ಭಗವತೇ ಗೌತಮಾಯ ತುಭ್ಯಂ ದದ್ಮ ಇತಿ ಗೋಶ್ವಾದಿಲಕ್ಷಣಮ್ ॥