స హోవాచ పితా పుత్రం క్రుద్ధముపశమయన్ — తథా తేన ప్రకారేణ నః అస్మాన్ త్వమ్ , హే తాత వత్స, జానీథా గృహ్ణీథాః, యథా యదహం కిఞ్చ విజ్ఞానజాతం వేద సర్వం తత్ తుభ్యమ్ అవోచమ్ ఇత్యేవ జానీథాః ; కోఽన్యో మమ ప్రియతరోఽస్తి త్వత్తః, యదర్థం రక్షిష్యే ; అహమపి ఎతత్ న జానామి, యత్ రాజ్ఞా పృష్టమ్ ; తస్మాత్ ప్రేహి ఆగచ్ఛ ; తత్ర ప్రతీత్య గత్వా రాజ్ఞి బ్రహ్మచర్యం వత్స్యావో విద్యార్థమితి । స ఆహ — భవానేవ గచ్ఛత్వితి, నాహం తస్య ముఖం నిరీక్షితుముత్సహే । స ఆజగామ, గౌతమః గోత్రతో గౌతమః, ఆరుణిః, యత్ర ప్రవాహణస్య జైవలేరాస ఆసనమ్ ఆస్థాయికా ; షష్ఠీద్వయం ప్రథమాస్థానే ; తస్మై గౌతమాయ ఆగతాయ ఆసనమ్ అనురూపమ్ ఆహృత్య ఉదకం భృత్యైరాహారయాఞ్చకార ; అథ హ అస్మై అర్ఘ్యం పురోధసా కృతవాన్ మన్త్రవత్ , మధుపర్కం చ । కృత్వా చైవం పూజాం తం హోవాచ — వరం భగవతే గౌతమాయ తుభ్యం దద్మ ఇతి గోశ్వాదిలక్షణమ్ ॥