ಸ ಹೋವಾಚ ವಿಜ್ಞಾಯತೇ ಹಾಸ್ತಿ ಹಿರಣ್ಯಸ್ಯಾಪಾತ್ತಂ ಗೋಅಶ್ವಾನಾಂ ದಾಸೀನಾಂ ಪ್ರವಾರಾಣಾಂ ಪರಿದಾನಸ್ಯ ಮಾ ನೋ ಭವಾನ್ಬಹೋರನಂತಸ್ಯಾಪರ್ಯಂತಸ್ಯಾಭ್ಯವದಾನ್ಯೋ ಭೂದಿತಿ ಸ ವೈ ಗೌತಮ ತೀರ್ಥೇನೇಚ್ಛಾಸಾ ಇತ್ಯುಪೈಮ್ಯಹಂ ಭವಂತಮಿತಿ ವಾಚಾ ಹ ಸ್ಮೈವ ಪೂರ್ವ ಉಪಯಂತಿ ಸ ಹೋಪಾಯನಕೀರ್ತ್ಯೋವಾಸ ॥ ೭ ॥
ಸ ಹೋವಾಚ ಗೌತಮಃ — ಭವತಾಪಿ ವಿಜ್ಞಾಯತೇ ಹ ಮಮಾಸ್ತಿ ಸಃ ; ನ ತೇನ ಪ್ರಾರ್ಥಿತೇನ ಕೃತ್ಯಂ ಮಮ, ಯಂ ತ್ವಂ ದಿತ್ಸಸಿ ಮಾನುಷಂ ವರಮ್ ; ಯಸ್ಮಾತ್ ಮಮಾಪ್ಯಸ್ತಿ ಹಿರಣ್ಯಸ್ಯ ಪ್ರಭೂತಸ್ಯ ಅಪಾತ್ತಂ ಪ್ರಾಪ್ತಮ್ ; ಗೋಅಶ್ವಾನಾಮ್ ಅಪಾತ್ತಮಸ್ತೀತಿ ಸರ್ವತ್ರಾನುಷಂಗಃ ; ದಾಸೀನಾಮ್ , ಪ್ರವಾರಾಣಾಂ ಪರಿವಾರಾಣಾಮ್ , ಪರಿಧಾನಸ್ಯ ಚ ; ನ ಚ ಯತ್ ಮಮ ವಿದ್ಯಮಾನಮ್ , ತತ್ ತ್ವತ್ತಃ ಪ್ರಾರ್ಥನೀಯಮ್ , ತ್ವಯಾ ವಾ ದೇಯಮ್ ; ಪ್ರತಿಜ್ಞಾತಶ್ಚ ವರಃ ತ್ವಯಾ ; ತ್ವಮೇವ ಜಾನೀಷೇ, ಯದತ್ರ ಯುಕ್ತಮ್ , ಪ್ರತಿಜ್ಞಾ ರಕ್ಷಣೀಯಾ ತವೇತಿ ; ಮಮ ಪುನಃ ಅಯಮಭಿಪ್ರಾಯಃ — ಮಾ ಭೂತ್ ನಃ ಅಸ್ಮಾನ್ ಅಭಿ, ಅಸ್ಮಾನೇವ ಕೇವಲಾನ್ಪ್ರತಿ, ಭವಾನ್ ಸರ್ವತ್ರ ವದಾನ್ಯೋ ಭೂತ್ವಾ, ಅವದಾನ್ಯೋ ಮಾ ಭೂತ್ ಕದರ್ಯೋ ಮಾ ಭೂದಿತ್ಯರ್ಥಃ ; ಬಹೋಃ ಪ್ರಭೂತಸ್ಯ, ಅನಂತಸ್ಯ ಅನಂತಫಲಸ್ಯೇತ್ಯೇತತ್ , ಅಪರ್ಯಂತಸ್ಯ ಅಪರಿಸಮಾಪ್ತಿಕಸ್ಯ ಪುತ್ರಪೌತ್ರಾದಿಗಾಮಿಕಸ್ಯೇತ್ಯೇತತ್ , ಈದೃಶಸ್ಯ ವಿತ್ತಸ್ಯ, ಮಾಂ ಪ್ರತ್ಯೇವ ಕೇವಲಮ್ ಅದಾತಾ ಮಾ ಭೂದ್ಭವಾನ್ ; ನ ಚ ಅನ್ಯತ್ರ ಅದೇಯಮಸ್ತಿ ಭವತಃ । ಏವಮುಕ್ತ ಆಹ — ಸ ತ್ವಂ ವೈ ಹೇ ಗೌತಮ ತೀರ್ಥೇನ ನ್ಯಾಯೇನ ಶಾಸ್ತ್ರವಿಹಿತೇನ ವಿದ್ಯಾಂ ಮತ್ತಃ ಇಚ್ಛಾಸೈ ಇಚ್ಛ ಅನ್ವಾಪ್ತುಮ್ ; ಇತ್ಯುಕ್ತೋ ಗೌತಮ ಆಹ — ಉಪೈಮಿ ಉಪಗಚ್ಛಾಮಿ ಶಿಷ್ಯತ್ವೇನ ಅಹಂ ಭವಂತಮಿತಿ । ವಾಚಾ ಹ ಸ್ಮೈವ ಕಿಲ ಪೂರ್ವೇ ಬ್ರಾಹ್ಮಣಾಃ ಕ್ಷತ್ತ್ರಿಯಾನ್ ವಿದ್ಯಾರ್ಥಿನಃ ಸಂತಃ ವೈಶ್ಯಾನ್ವಾ, ಕ್ಷತ್ತ್ರಿಯಾ ವಾ ವೈಶ್ಯಾನ್ ಆಪದಿ ಉಪಯಂತಿ ಶಿಷ್ಯವೃತ್ತ್ಯಾ ಹಿ ಉಪಗಚ್ಛಂತಿ, ನ ಉಪಾಯನಶುಶ್ರೂಷಾದಿಭಿಃ ; ಅತಃ ಸ ಗೌತಮಃ ಹ ಉಪಾಯನಕೀರ್ತ್ಯಾ ಉಪಗಮನಕೀರ್ತನಮಾತ್ರೇಣೈವ ಉವಾಸ ಉಷಿತವಾನ್ , ನ ಉಪಾಯನಂ ಚಕಾರ ॥