అథ తదా ఎనం మృతమ్ అగ్నయే అగ్న్యర్థమేవ అన్త్యాహుత్యై హరన్తి ఋత్విజః ; తస్య ఆహుతిభూతస్య ప్రసిద్ధః అగ్నిరేవ హోమాధికరణమ్ , న పరికల్ప్యోఽగ్నిః ; ప్రసిద్ధైవ సమిత్ సమిత్ ; ధూమో ధూమః ; అర్చిః అర్చిః ; అఙ్గారా అఙ్గారాః ; విస్ఫులిఙ్గా విస్ఫులిఙ్గాః ; యథాప్రసిద్ధమేవ సర్వమిత్యర్థః । తస్మిన్ పురుషమ్ అన్త్యాహుతిం జుహ్వతి ; తస్యై ఆహుత్యై ఆహుతేః, పురుషః భాస్వరవర్ణః అతిశయదీప్తిమాన్ , నిషేకాదిభిరన్త్యాహుత్యన్తైః కర్మభిః సంస్కృతత్వాత్ , సమ్భవతి నిష్పద్యతే ॥