ಏವಂಶಬ್ದಸ್ಯ ಪ್ರಕೃತಪಂಚಾಗ್ನಿಪರಾಮರ್ಶಿತ್ವಂ ಸ್ಫುಟೀಕರ್ತುಂ ಚೋದಯತಿ —
ನನ್ವಿತಿ ।
ಏವಮೇತದ್ವಿದುರಿತಿ ಶ್ರುತಮೇತದ್ದರ್ಶನಮಿತ್ಯುಕ್ತಂ ತದೇವೇದಮಿತಿ ಪ್ರತ್ಯಭಿಜ್ಞಾಪಕಂ ದರ್ಶಯತಿ —
ತತ್ರ ಹೀತಿ ।
ಆದಿಪದಮಾದಿತ್ಯಂ ಸಮಿಧಮಿತ್ಯಾದಿ ಸಂಗ್ರಹೀತುಮ್ , ರಶ್ಮೀನಾಂ ಧೂಮತ್ವಮಹ್ನೋಽರ್ಚಿಷ್ಟ್ವಮಿತ್ಯಾದಿ ಗ್ರಹೀತುಂ ದ್ವಿತೀಯಮಾದಿಪದಮ್ ।
ಪ್ರತ್ಯಭಿಜ್ಞಾಫಲಮಾಹ —
ತಸ್ಮಾದಿತಿ ।
ಪ್ರಶ್ನಪ್ರತಿವಚನವಿಷಯಸ್ಯೈವ ಪ್ರಕೃತಸ್ಯೈವಂಶಬ್ದಸ್ಯ ಪರಾಮರ್ಶಾನ್ನ ಷಟ್ಪ್ರಶ್ನೀಯಂ ದರ್ಶನಮಿಹ ಪರಾಮೃಷ್ಟಮಿತಿ ಪರಿಹರತಿ —
ನೇತ್ಯಾದಿನಾ ।
ಸಂಗೃಹೀತಂ ಪರಿಹಾರಂ ವಿವೃಣೋತಿ —
ಯತಿಥ್ಯಾಮಿತ್ಯಸ್ಯೇತಿ ।
ವ್ಯಧಿಕರಣೇ ಷಷ್ಟ್ಯೌ । ಯಾವದೇವ ವಸ್ತುಪರಿಗ್ರಹೋ ವಿಷಯ ಇತ್ಯರ್ಥಃ ।
ಷಟ್ಪ್ರಶ್ನೀಯಮೇವ ವ್ಯವಹಿತಂ ದರ್ಶನಮತ್ರ ಪರಾಮೃಷ್ಟಂ ಚೇತ್ತದಾ ಯತಿಥ್ಯಾಮಿತಿ ಪ್ರಶ್ನೋ ವ್ಯರ್ಥಃ ಸ್ಯಾತ್ । ಷಟ್ಪ್ರಶ್ನೀನಿರ್ಣೀತದರ್ಶನಶೇಷಭೂತದರ್ಶನಸ್ಯ ಪ್ರಶ್ನಾದೃತೇ ಪ್ರತಿವಚನಸಂಭವಾದಿತ್ಯಾಹ —
ಅನ್ಯಥೇತಿ ।
ಕಿಂಚ ಪೂರ್ವಸ್ಮಿನ್ಗ್ರಂಥೇ ಪ್ರಚಯಶಿಷ್ಟತಯಾ ಪಂಚತ್ವಸಂಖ್ಯಾಯಾ ನಿಶ್ಚಿತತ್ವಾತ್ತದವಚ್ಛಿನ್ನಾಃ ಸಾಂಪಾದಿಕಾಗ್ನಯ ಏವಾತ್ರೈವಂಶಬ್ದೇನ ಪರಾಮ್ರಷ್ಟುಮುಚಿತಾ ಇತ್ಯಾಹ —
ನಿರ್ಜ್ಞಾತತ್ವಾಚ್ಚೇತಿ ।
ಅಗ್ನಿಹೋತ್ರಪ್ರಕರಣೇ ನಿರ್ಜ್ಞಾತಮೇವಾಗ್ನ್ಯಾದಿ ಪೂರ್ವಗ್ರಂಥೇಽಪ್ಯನೂದ್ಯತೇ । ತಥಾ ಚಾಗ್ನಿಹೋತ್ರದರ್ಶನಮವ್ಯವಹಿತಮೇವಂಶಬ್ದೇನ ಕಿಂ ನ ಪರಾಮೃಷ್ಟಮಿತಿ ಶಂಕತೇ —
ಅಥೇತಿ ।
ಅಗ್ನಿಹೋತ್ರದರ್ಶನಂ ಪೂರ್ವಗ್ರಂಥೇಽನೂದ್ಯತೇ ಚೇತ್ತತ್ಪ್ರಕರಣೇ ಪ್ರಾಪ್ತಂ ರೂಪಮನತಿಕ್ರಮ್ಯೈವಾಂತರಿಕ್ಷಾದೇರಪ್ಯತ್ರಾನುವದನಂ ಸ್ಯಾನ್ನ ತು ತದ್ವೈಪರೀತ್ಯೇನಾನುವದನಂ ಯುಕ್ತಮ್ । ಅನುವಾದಸ್ಯ ಪುರೋವಾದಸಾಪೇಕ್ಷತ್ವಾತ್ । ನ ಚಾತ್ರಾಂತರಿಕ್ಷಾದ್ಯನೂದ್ಯತೇ । ತಸ್ಮಾದೇವಂಶಬ್ದೋ ನಾಗ್ನಿಹೋತ್ರಪರಾಮರ್ಶೀತಿ ಪರಿಹರತಿ —
ಯಥಾ ಪ್ರಾಪ್ತಸ್ಯೇತಿ ।
ದ್ಯುಲೋಕಾದಿವಾದಸ್ಯಾಂತರಿಕ್ಷಾದ್ಯುಪಲಕ್ಷಣಾರ್ಥತ್ವಾತ್ಪೂರ್ವಸ್ಯಾನುವಾದತ್ವಸಂಭವಾದೇವಂಶಬ್ದಸ್ಯಾಗ್ನಿಹೋತ್ರವಿಷಯತ್ವಸಿದ್ಧಿರಿತಿ ಚೋದಯತಿ —
ಅಥೇತಿ ।
ಪ್ರಾಪಕಾಭಾವಾದುಪಲಕ್ಷಣಪಕ್ಷಾಯೋಗೇಽಪ್ಯಂಗೀಕೃತ್ಯ ಪಂಚಾಗ್ನಿನಿರ್ದೇಶವೈಯರ್ಥ್ಯೇನ ದೂಷಯತಿ —
ತಥಾಽಪೀತಿ ।
ಇತಶ್ಚ ಸ್ವತಂತ್ರಮೇವ ಪಂಚಾಗ್ನಿದರ್ಶನಮೇವಂಶಬ್ದಪರಾಮೃಷ್ಟಮಿತ್ಯಾಹ —
ಶ್ರುತ್ಯಂತರಾಚ್ಚೇತಿ ।
ಸಮಿದಾದಿಸಾಮ್ಯದರ್ಶನಾದಗ್ನಿಹೋತ್ರದರ್ಶನಶೇಷಭೂತಮೇವೈತದ್ದರ್ಶನಮಿತ್ಯುಕ್ತಮನೂದ್ಯ ದೂಷಯತಿ —
ಯತ್ತ್ವಿತ್ಯಾದಿನಾ ।
ಅವೋಚಾಮಾಗ್ನಿಹೋತ್ರಸ್ತುತ್ಯರ್ಥತ್ವಾದಗ್ನಿಹೋತ್ರಸ್ಯೈವ ಕಾರ್ಯಮಿತ್ಯುಕ್ತಮಿತ್ಯತ್ರೇತಿ ಶೇಷಃ ।
ಏವಂಶಬ್ದೇನಾಗ್ನಿಹೋತ್ರಪರಾಮರ್ಶಾಸಂಭವೇ ಫಲಿತಮಾಹ —
ತಸ್ಮಾದಿತಿ ।
ತಚ್ಛಬ್ದಾರ್ಥಮೇವ ಸ್ಫುಟಯತಿ —
ಏವಮಿತೀತಿ ।
ಪ್ರಕೃತಂ ಪಂಚಾಗ್ನಿದರ್ಶನಂ ತಚ್ಚ ಸ್ವತಂತ್ರಮಿತ್ಯುಕ್ತಂ ತದ್ವತಾಮರ್ಚಿರಾದಿಪ್ರತಿಪತ್ತಿರ್ನ ಕೇವಲಕರ್ಮಿಣಾಮಿತ್ಯರ್ಥಃ ।