प्राणोपासकस्य वित्तार्थिनो मन्थाख्यं कर्मोक्त्वा ब्राह्मणान्तरमुत्थापयति —

यादृगिति ।

उक्तगुणः स कथं स्यादित्यपेक्षायामिति शेषः । तच्छब्दो यथोक्तपुत्रविषयः ।

यदस्मिन्ब्राह्मणे पुत्रमन्थाख्यं कर्म वक्ष्यते तद्भवति सर्वाधिकारविषयमित्याशङ्क्याऽऽह —

प्राणेति ।

पुत्रमन्थस्य कालनियामाभावमाशङ्क्याऽऽह —

यदेति ।

किमत्र गमकमित्याशङ्क्य रेतःस्तुतिरित्याह —

इत्येतदिति ।

पृथिव्याः सर्वभूतसारत्वे मधुब्राह्मणं प्रमाणयति —

सर्वभूतानामिति ।

तत्र गार्गिब्राह्मणं प्रमाणमित्याह —

अप्सु हीति ।

अपां पृथिव्याश्च रसत्वं कारणत्वाद्युक्तमोषध्यादीनां कथमित्याशङ्क्याऽऽह —

कार्यत्वादिति ।

रेतोऽसृजतेति प्रस्तुत्य रेतसस्तत्र तेजःशब्दप्रयोगात्तस्य पुरुषे सारत्वमैतरेयके विवक्षितमित्याह —

सर्वेभ्य इति ॥१॥

श्रेष्ठमनुश्रयन्तेऽनुसरन्तीति श्रेष्ठानुश्रयणाः ।