యత ఎవం సర్వభూతానాం సారతమమ్ ఎతత్ రేతః, అతః కాను ఖల్వస్య యోగ్యా ప్రతిష్టేతి స హ స్రష్టా ప్రజాపతిరీక్షాఞ్చక్రే । ఈక్షాం కృత్వా స స్త్రియం ససృజే । తాం చ సృష్ట్వా అధ ఉపాస్త మైథునాఖ్యం కర్మ అధఉపాసనం నామ కృతవాన్ । తస్మాత్స్త్రియమధ ఉపాసీత ; శ్రేష్ఠానుశ్రయణా హి ప్రజాః । అత్ర వాజపేయసామాన్యక్లృప్తిమాహ — స ఎనం ప్రాఞ్చం ప్రకృష్టగతియుక్తమ్ ఆత్మనో గ్రావాణం సోమాభిషవోపలస్థానీయం కాఠిన్యసామాన్యాత్ ప్రజననేన్ద్రియమ్ , ఉదపారయత్ ఉత్పూరితవాన్ స్త్రీవ్యఞ్జనం ప్రతి ; తేన ఎనాం స్త్రియమ్ అభ్యసృజత్ అభిసంసర్గం కృతవాన్ ॥