ಅಥ ಯಸ್ಯ ಜಾಯಾಮ್ ಆರ್ತವಂ ವಿಂದೇತ್ ಋತುಭಾವಂ ಪ್ರಾಪ್ನುಯಾತ್ — ಇತ್ಯೇವಮಾದಿಗ್ರಂಥಃ ‘ಶ್ರೀರ್ಹ ವಾ ಏಷಾ ಸ್ತ್ರೀಣಾಮ್’ ಇತ್ಯತಃ ಪೂರ್ವಂ ದ್ರಷ್ಟವ್ಯಃ, ಸಾಮರ್ಥ್ಯಾತ್ । ತ್ರ್ಯಹಂ ಕಂಸೇನ ಪಿಬೇತ್ , ಅಹತವಾಸಾಶ್ಚ ಸ್ಯಾತ್ ; ನೈನಾಂ ಸ್ನಾತಾಮ್ ಅಸ್ನಾತಾಂ ಚ ವೃಷಲೋ ವೃಷಲೀ ವಾ ನೋಪಹನ್ಯಾತ್ ನೋಪಸ್ಪೃಶೇತ್ । ತ್ರಿರಾತ್ರಾಂತೇ ತ್ರಿರಾತ್ರವ್ರತಸಮಾಪ್ತೌ ಆಪ್ಲುತ್ಯ ಸ್ನಾತ್ವಾ ಅಹತವಾಸಾಃ ಸ್ಯಾದಿತಿ ವ್ಯವಹಿತೇನ ಸಂಬಂಧಃ ; ತಾಮ್ ಆಪ್ಲುತಾಂ ವ್ರೀಹನ್ ಅವಘಾತಯೇತ್ ವ್ರೀಹ್ಯವಘಾತಾಯ ತಾಮೇವ ವಿನಿಯುಂಜ್ಯಾತ್ ॥