అథ యస్య జాయామ్ ఆర్తవం విన్దేత్ ఋతుభావం ప్రాప్నుయాత్ — ఇత్యేవమాదిగ్రన్థః ‘శ్రీర్హ వా ఎషా స్త్రీణామ్’ ఇత్యతః పూర్వం ద్రష్టవ్యః, సామర్థ్యాత్ । త్ర్యహం కంసేన పిబేత్ , అహతవాసాశ్చ స్యాత్ ; నైనాం స్నాతామ్ అస్నాతాం చ వృషలో వృషలీ వా నోపహన్యాత్ నోపస్పృశేత్ । త్రిరాత్రాన్తే త్రిరాత్రవ్రతసమాప్తౌ ఆప్లుత్య స్నాత్వా అహతవాసాః స్యాదితి వ్యవహితేన సమ్బన్ధః ; తామ్ ఆప్లుతాం వ్రీహన్ అవఘాతయేత్ వ్రీహ్యవఘాతాయ తామేవ వినియుఞ్జ్యాత్ ॥