సాన్నిధ్యాత్ఖిలకాణ్డస్య వంశోఽయమితి శఙ్కాం నివర్తయన్వంశబ్రాహ్మణతాత్పర్యమాహ —
అథేతి ।
విద్యాభేదాదతీతస్య కాణ్డద్వయస్య ప్రత్యేకం వంశభాక్త్వేఽపి నాస్య పృథక్త్వభాగిత్వం ఖిలత్వేన తచ్ఛేషత్వాత్ । తథా చ సమాప్తౌ పఠితో వంశః సమస్తస్యైవ ప్రవచనస్య భవిష్యతీత్యర్థః ।
పూర్వౌ వంశౌ పురుషవిశేషితౌ తృతీయస్తు స్త్రీవిశేషితస్తత్ర కిం కరణమిత్యాశఙ్క్యాఽఽహ —
స్త్రీప్రాధాన్యాదితి ।
తదేవ స్ఫుటయతి —
గుణవానితి ।
కీర్త్యతే బ్రాహ్మణేనేతి సంబన్ధః । శుక్లాని యజూంషీత్యస్య వ్యాఖ్యానమవ్యామిశ్రాణీతి । దోషైరసంకీర్ణాని పౌరుషేయత్వదోషద్వారాభావాదిత్యర్థః । అయాతయామాన్యదుష్టాన్యగతార్థానీత్యర్థః । పాఠక్రమేణ మనుష్యాదిః ప్రజాపతిపర్యన్తో వంశో వ్యాఖ్యాతః ।
సంప్రత్యర్థక్రమమాశ్రిత్యాఽఽహ —
ప్రజాపతిమితి ।
అధోముఖత్వం పాఠక్రమాపేక్షయోచ్యతే ।
తత్రాపి ప్రజాపతిమారభ్య సాఞ్జీవీపుత్రపర్యన్తం వాజసనేయిశాఖాసు సర్వాస్వేకో వంశ ఇత్యాహ —
సమానమితి ।
ప్రవచనాఖ్యస్య వంశాత్మనో బ్రహ్మణః సంబన్ధాత్ప్రజాపతిర్విద్యాం లబ్ధవానిత్యాహ —
బ్రహ్మణ ఇతి ।
తస్యాధికారిభేదాదవాన్తరభేదం దర్శయతి —
తచ్చేతి ।
ప్రజాపతిముఖప్రబన్ధః ప్రపఞ్చః సైవ పరమ్పరా తయేతి యావత్ ।
తస్య పరమాత్మరూపం స్వయమ్భూత్వమభిదధాతి —
అనాదీతి ।
తస్యాపౌరుషేయత్వేనాసంభావితదోషతయా ప్రామాణ్యమభిప్రేత్య విశినష్టి —
నిత్యమితి ।
ఆదిమధ్యాన్తరేషు కృతమఙ్గలా గ్రన్థాః ప్రచారిణో భవన్తీతి మన్వానః సన్నాహ —
తస్మై బ్రహ్మణే నమ ఇతి ॥౧ – ౪॥