ತತ್ರೈಷಾಽಕ್ಷರಯೋಜನಾ -
ಧೃತರಾಷ್ಟ್ರ ಉವಾಚೇತಿ ।
ಧೃತರಾಷ್ಟ್ರೋ ಹಿ ಪ್ರಜ್ಞಾಚಕ್ಷುರ್ಬಾಹ್ಯಚಕ್ಷುರಭಾವಾದ್ಬಾಹ್ಯಮರ್ಥಂ ಪ್ರತ್ಯಕ್ಷಯಿತುಮನೀಶಃ ಸನ್ ಅಭ್ಯಾಶವರ್ತಿನಂ ಸಂಜಯಮಾತ್ಮನೋ ಹಿತೋಪದೇಷ್ಟಾರಂ ಪೃಚ್ಛತಿ -
ಧರ್ಮಕ್ಷೇತ್ರ ಇತಿ ।
ಧರ್ಮಸ್ಯ ತದ್ಬುದ್ಧೇಶ್ಚ ಕ್ಷೇತ್ರಮಭಿವೃದ್ಧಿಕಾರಣಂ ಯದುಚ್ಯತೇ ಕುರುಕ್ಷೇತ್ರಮಿತಿ, ತತ್ರ ಸಮವೇತಾಃ ಸಂಗತಾಃ, ಯುಯುತ್ಸವೋ ಯೋದ್ಧುಕಾಮಾಸ್ತೇ ಚ ಕೇಚಿನ್ಮದೀಯಾ ದುರ್ಯೋಧನಪ್ರಭೃತಯಃ ಪಾಂಡವಾಶ್ಚಾಪರೇ ಯುಧಿಷ್ಠಿರಾದಯಃ, ತೇ ಚ ಸರ್ವೇ ಯುದ್ಧಭೂಮೌ ಸಂಗತಾ ಭೂತ್ವಾ ಕಿಂ ಕೃತವಂತಃ ॥ ೧ ॥