తత్రైషాఽక్షరయోజనా -
ధృతరాష్ట్ర ఉవాచేతి ।
ధృతరాష్ట్రో హి ప్రజ్ఞాచక్షుర్బాహ్యచక్షురభావాద్బాహ్యమర్థం ప్రత్యక్షయితుమనీశః సన్ అభ్యాశవర్తినం సఞ్జయమాత్మనో హితోపదేష్టారం పృచ్ఛతి -
ధర్మక్షేత్ర ఇతి ।
ధర్మస్య తద్బుద్ధేశ్చ క్షేత్రమభివృద్ధికారణం యదుచ్యతే కురుక్షేత్రమితి, తత్ర సమవేతాః సఙ్గతాః, యుయుత్సవో యోద్ధుకామాస్తే చ కేచిన్మదీయా దుర్యోధనప్రభృతయః పాణ్డవాశ్చాపరే యుధిష్ఠిరాదయః, తే చ సర్వే యుద్ధభూమౌ సఙ్గతా భూత్వా కిం కృతవన్తః ॥ ౧ ॥