‘కిమస్మదీయం ప్రబలం బలం ప్రతిలభ్య ధీరపురుషైర్భీష్మాదిభిరధిష్ఠితం పరేషాం భయమావిరభూత్ , యద్వా పక్షద్వయహింసానిమిత్తాధర్మభయమాసీత్ , యేనైతే యుద్ధాదుపరమేరన్ ? ‘ ఇత్యేవం పుత్రపరవశస్య పుత్రస్నేహాభినివిష్టస్య ధృతరాష్ట్రస్య ప్రశ్నే సఞ్జయస్య ప్రతివచనమ్ -
దృష్ట్వేత్యాది ।
పాణ్డవానాం భయప్రసఙ్గో నాస్తీత్యేతత్ తుశబ్దేన ద్యోత్యతే । ప్రత్యుత దుర్యోధనస్యైవ రాజ్ఞో భయం ప్రభూతం ప్రాదుర్బభూవ । పాణ్డవానాం - పాణ్డుసుతానాం యుధిష్ఠిరాదీనామనీకం - సైన్యం ధృష్టద్యుమ్నాదిభిరతిధృష్టైర్వ్యూహాధిష్ఠితం దృష్ట్వా ప్రత్యక్షేణ ప్రతీత్య త్రస్తహృదయో దుర్యోధనో రాజా తదా - తస్యాం సఙ్గ్రామోద్యోగావస్థాయామ్ , ఆచార్యం ద్రోణనామానమాత్మనః శిక్షితారం రక్షితారం చ శ్లాఘయన్నుపసఙ్గమ్య - తదీయం సమీపం వినయేన ప్రాప్య భయోద్విగ్నహృదయత్వేఽపి తేజస్విత్వాదేవ వచనమర్థసహితం వాక్యముక్తవానిత్యర్థః ॥ ౨ ॥