తదేవ వచనముదాహరతి -

పశ్యేతి ।

ఎతామస్మదభ్యాశే మహాపురుషానపి భవత్ప్రముఖానపరిగణయ్య భయలేశశూన్యామవస్థితాం చమూమిమాం సేనాం పాణ్డుపుత్రైర్యుధిష్ఠిరాదిభిరానీతాం మహతీమనేకాక్షౌహిణీసహితామక్షోభ్యాం, పశ్యేత్యాచార్యం దుర్యోధనో నియుఙ్క్తే । నియోగద్వారా చ తస్మిన్ పరేషామవజ్ఞాం విజ్ఞాపయన్ క్రోధాతిరేకముత్పాదయితుముత్సహతే ।

పరకీయసేనాయా వైశిష్ట్యాభిధానద్వారా పరపక్షేఽపి త్వదీయమేవ బలమితి సూచయన్ ఆచార్యస్య తన్నిరసనం సుకరమితి మన్వానః సన్నాహ -

వ్యూఢామితి ।

రాజ్ఞో ద్రుపదస్య పుత్రః తవ చ శిష్యో ధృష్టద్యుమ్నో లోకే ఖ్యాతిముపగతః, స్వయం చ శస్త్రాస్త్రవిద్యాసమ్పన్నో మహామహిమా తేన వ్యూహమాపాద్యాధిష్ఠితామిమాం చమూం కిమితి న ప్రతిపద్యసే కిమితి వా మృష్యసీత్యర్థః ॥ ౩ ॥