ದ್ರೋಣಾದಿಪರಿಗಣನಸ್ಯ ಪರಿಶಿಷ್ಟಪರಿಸಂಖ್ಯಾರ್ಥತ್ವಂ ವ್ಯಾವರ್ತಯತಿ -

ಅನ್ಯೇ ಚೇತಿ ।

ಸರ್ವೇಽಪಿ ಭವಂತಮಾರಭ್ಯ ಮದೀಯಪೃತನಾಯಾಂ ಪ್ರವಿಷ್ಟಾಃ ಸ್ವಜೀವಿತಾದಪಿ ಮಹ್ಯಂ ಸ್ಪೃಹಯಂತೀತ್ಯಾಹ -

ಮದರ್ಥ ಇತಿ ।

ಯತ್ತು ತೇಷಾಂ ಶೂರತ್ವಮುಕ್ತಂ ತದಿದಾನೀಂ ವಿಶದಯತಿ -

ನಾನೇತಿ ।

ನಾನಾವಿಧಾನಿ ಅನೇಕಪ್ರಕಾರಾಣಿ ಶಸ್ತ್ರಾಣಿ - ಆಯುಧಾನಿ ಪ್ರಹರಣಾನಿ - ಪ್ರಹರಣಸಾಧನಾನಿ ಯೇಷಾಂ ತೇ ತಥಾ ।

ಬಹುವಿಧಾಯುಧಸಂಪತ್ತಾವಪಿ ತತ್ಪ್ರಯೋಗೇ ನೈಪುಣ್ಯಾಭಾವೇ ತದ್ವೈಫಲ್ಯಮಿತಿ ಚೇತ್ , ನೇತ್ಯಾಹ -

ಸರ್ವ ಇತಿ

॥ ೯ ॥