కిం తద్వాక్యమిత్యపేక్షాయామాహ –

శ్రీభగవానితి ।

కుతో - హేతోస్త్వా - త్వాం సర్వక్షత్రియప్రవరం కశ్మలం - మలినం శిష్టగర్హితం యుద్ధాత్ పరాఙ్ముఖత్వం విషమే - సభయస్థానే సముపస్థితం - ప్రాప్తమ్ ? అనార్యైః - శాస్త్రార్థమవిద్వద్భిర్జుష్టం - సేవితమ్ , అస్వర్గ్యం - స్వర్గానర్హం - ప్రత్యవాయకారణమ్ , ఇహ చ అకీర్తికరమ్ - అయశస్కరమ్ ।  అర్జుననామ్నా ప్రఖ్యాతస్య తవ నైతద్యుక్తమిత్యర్థః ॥ ౨ ॥