‘అహింసా పరమో ధర్మో భిక్షాశనం చ ‘ ఇత్యేవంలక్షణయా బుద్ధ్యా యుద్ధవైముఖ్యమర్జునస్య శ్రుత్వా స్వపుత్రాణాం రాజ్యైశ్వర్యమప్రచలితమవధార్య స్వస్థహృదయం ధృతరాష్ట్రం దృష్ట్వా తస్య దురాశామపనేష్యామీతి మనీషయా సఞ్జయస్తం ప్రత్యుక్తవానిత్యాహ -
సఞ్జయ ఇతి ।
పరమేశ్వరేణ స్మార్యమాణోఽపి కృత్యాకృత్యే సహసా నార్జునః సస్మార, విపర్యయప్రయుక్తస్య శోకస్య దృఢతరమోహహేతుత్వాత్ ।
తథాపి తం భగవాన్ నోపేక్షితవానిత్యాహ -
తం తథేతి ।
తం - ప్రకృతం పార్థం, తథా - స్వజనమరణప్రసఙ్గదర్శనేన కృపయా - కరుణయా ఆవిష్టం - అధిష్ఠితమ్ , అశ్రుభిః పూర్ణే సమాకులే చేక్షణే యస్య తమ్ , అశ్రువ్యాప్తతరలాక్షం విషీదన్తం - శోచన్తం ఇదం - వక్ష్యమాణం వాక్యం - సోపపత్తికం వచనం మధునామానమసురం సూదితవానితి మధుసూదనో భగవానుక్తవాన్ , న తు యథోక్తమర్జునముపేక్షితవానిత్యర్థః ॥ ౧ ॥