సద్బుద్ధివ్యభిచారద్వారా బోధ్యస్యాపి వ్యభిచారాత్ తదవ్యభిచారిత్వహేతోరసిద్ధిరితి శఙ్కతే -
ఘటే వినష్ట ఇతి ।
సద్బుద్ధేర్ఘటబుద్ధివద్ఘటమాత్రవిషయత్వాభావాత్ , న ఘటనాశే వ్యభిచారోస్తీతి పరిహరతి -
న, పటాదావితి ।
సద్బుద్ధేరఘటవియత్వే నిరాలమ్బనత్వాయోగాత్ విషయాన్తరం వక్తవ్యమిత్యాశఙ్క్యాహ -
విశేషణేతి ।
సతోఽకల్పితత్వహేతోరవ్యభిచారిత్వస్యాసిద్ధిముద్ధృత్య, విశేషాణాం కల్పితత్వహేతోర్వ్యభిచారిత్వస్యాసిద్ధిం శఙ్కతే -
సదితి ।
యథా సద్బుద్ధిర్ఘటే నష్టే పటాదౌ దృష్టత్వాదవ్యభిచారిణీతి అవ్యభిచారః సతో దర్శితః, తథా ఘటబుద్ధిరపి ఘటే నష్టే ఘటాన్తరే దృష్టేత్యవ్యభిచారాత్ ఘటే వ్యభిచారాసిద్ధౌ విశేషాన్తరేష్వపి కల్పితత్వహేతుర్వ్యభిచారో న సిధ్యతీత్యర్థః ।