ಚಾಕ್ಷುಷದರ್ಶನಮಾತ್ರವೃತ್ತಿಂ ವ್ಯಾವರ್ತಯತಿ -
ಅನುಪಲಬ್ಧಿರಿತಿ ।
ನಹಿ ಯಥೋಕ್ತಸಂಘಾತರೂಪಾಣಿ ಭೂತಾನಿ ಪೂರ್ವಮುತ್ಪತ್ತೇಃ ಉಪಲಭ್ಯಂತೇ । ತೇನ ತಾನಿ ತಥಾ ವ್ಯಪದೇಶಭಾಂಜಿ ಭವಂತಿ ಇತ್ಯರ್ಥಃ ।
ಕಿಂ ತತ್ ಮಧ್ಯಮ್ , ಯದೇಷಾಂ ವ್ಯಕ್ತಮಿಷ್ಯತೇ ? ತದಾಹ -
ಉತ್ಪನ್ನಾನೀತಿ ।
ಉತ್ಪತ್ತೇರೂರ್ಧ್ವಂ ಮರಣಾಚ್ಚ ಪೂರ್ವಂ ವ್ಯಾವಹಾರಿಕಂ ಸತ್ತ್ವಂ ಮಧ್ಯಮೇಷಾಂ ವ್ಯಕ್ತಮಿತಿ ತಥೋಚ್ಯತೇ ।
ಜನ್ಮಾನುಸಾರಿತ್ವಂ ವಿಲಯಸ್ಯ ಯುಕ್ತಮ್ ಇತಿ ಮತ್ವಾ ತಾತ್ಪರ್ಯಾರ್ಥಮಾಹ -
ಮರಣಾದಿತಿ ।
ಉಕ್ತೇಽರ್ಥೇ ಪೌರಾಣಿಕಸಂಮತಿಮಾಹ -
ತಥಾ ಚೇತಿ ।
ತತ್ರೇತ್ಯಸ್ಯಾರ್ಥಮಾಹ -
ಅದೃಷ್ಟೇತಿ ।
ಪೂರ್ವಮ್ ಅದೃಷ್ಟಾನಿ ಸಂತಿ, ಪುನರ್ದೃಷ್ಟಾನಿ, ತಾನ್ಯೇವ ಪುನರ್ನಷ್ಟಾನಿ, ತದೇವಂ ಭ್ರಾಂತಿವಿಷಯತಯಾ ಘಟಿಕಾಯಂತ್ರವತ್ ಚಕ್ರೀಭೂತೇಷು ಭೂತೇಷು ಶೋಕನಿಮಿತಸ್ಯ ಪ್ರಲಾಪಸ್ಯ ನಾವಕಾಶೋಽಸ್ತೀತ್ಯರ್ಥಃ ॥ ೨೮ ॥