బుద్ధియోగస్య ఫలవత్త్వే ఫలితమాహ -

తస్మాదితి ।

పూర్వార్ధం వ్యాచష్టే -

బుద్ధీత్యాదినా ।

నను - సమత్వబుద్ధిమాత్రాత్ న పుణ్యపాపనివృత్తిర్యుక్తా, పరమార్థదర్శనవతస్తన్నివృత్తిప్రసిద్ధేః, ఇతి తత్రాహ -

సత్త్వేతి ।

ఉత్తరార్ధం వ్యాచష్టే -

తస్మాదితి ।

స్వధర్మమనుతిష్ఠతో యథోక్తయోగార్థం కిమర్థం మనో యోజనీయమ్ ? ఇత్యాశఙ్క్యాహ -

యోగో హీతి ।

తర్హి యథోక్తయోగసామర్థ్యాదేవ దర్శితఫలసిద్ధేరనాస్థా స్వధర్మానుష్ఠానే ప్రాప్తా, ఇత్యాశఙ్క్యాహ -

స్వధర్మాఖ్యేష్వితి ।

ఈశ్వరార్పితచేతస్తయా కర్మసు వర్తమానస్య - అనుష్ఠాననిష్ఠస్య యా యథోక్తా బుద్ధిః, తత్ తేషు కౌశలమ్ ఇతి యోజనా ।

కర్మణాం బన్ధస్వభావత్వాత్ తదనుష్ఠానే బన్ధానుబన్ధః స్యాత్ , ఇత్యాశఙ్క్య కౌశలమేవ విశదయతి -

తద్ధీతి ।

సమత్వబుద్ధేరేవంఫలత్వే స్థితే ఫలితముపసంహరతి -

తస్మాదితి

॥ ౫౦ ॥