నను - వివేకవతో విషయదోషదర్శినో విషయేభ్యః స్వయమేవేన్ద్రియాణి వ్యావర్తన్తే, కిం తత్ర ప్రజ్ఞాస్థైర్యం చికీర్షతా కర్తవ్యమ్ ? ఇతి, తత్రాహ -
యతతో హీతి ।
విషయేషు భూయో భూయో దోషదర్శనమేవప్రయత్నః ।
అపిశబ్దస్య ప్రయత్నం కుర్వతోఽపీతి సమ్బన్ధం గృహీత్వా, సమ్బన్ధాన్తరమాహ -
పురుషస్యేతి ।
ప్రమథనశీలత్వం ప్రకటయతి -
విషయేతి ।
విక్షోభస్య ఆకులీకరణస్య ఫలమాహ -
ఆకులీకృత్యేతి ।
ప్రకాశమేవేత్యుక్తం విశదయతి -
పశ్యత ఇతి ।
విపశ్చితః - విదుషోఽపి, ప్రకాశమేవ - ప్రకాశశబ్దితవివేకాఖ్యవిజ్ఞానేన యుక్తమేవ మనో హరన్తీన్ద్రియాణీతి సమ్బన్ధః ।
॥ ౬౦ ॥