अद्वैतशारदा | दक्षिणाम्नाय श्रीशारदापीठम्, शृङ्गेरी

ರಾಗದ್ವೇಷವಿಯುಕ್ತೈಸ್ತು ವಿಷಯಾನಿಂದ್ರಿಯೈಶ್ಚರನ್ ।
ಆತ್ಮವಶ್ಯೈರ್ವಿಧೇಯಾತ್ಮಾ ಪ್ರಸಾದಮಧಿಗಚ್ಛತಿ ॥ ೬೪ ॥

ರಾಗದ್ವೇಷವಿಯುಕ್ತೈಃ ರಾಗಶ್ಚ ದ್ವೇಷಶ್ಚ ರಾಗದ್ವೇಷೌ, ತತ್ಪುರಃಸರಾ ಹಿ ಇಂದ್ರಿಯಾಣಾಂ ಪ್ರವೃತ್ತಿಃ ಸ್ವಾಭಾವಿಕೀ, ತತ್ರ ಯೋ ಮುಮುಕ್ಷುಃ ಭವತಿ ಸಃ ತಾಭ್ಯಾಂ ವಿಯುಕ್ತೈಃ ಶ್ರೋತ್ರಾದಿಭಿಃ ಇಂದ್ರಿಯೈಃ ವಿಷಯಾನ್ ಅವರ್ಜನೀಯಾನ್ ಚರನ್ ಉಪಲಭಮಾನಃ ಆತ್ಮವಶ್ಯೈಃ ಆತ್ಮನಃ ವಶ್ಯಾನಿ ವಶೀಭೂತಾನಿ ಇಂದ್ರಿಯಾಣಿ ತೈಃ ಆತ್ಮವಶ್ಯೈಃ ವಿಧೇಯಾತ್ಮಾ ಇಚ್ಛಾತಃ ವಿಧೇಯಃ ಆತ್ಮಾ ಅಂತಃಕರಣಂ ಯಸ್ಯ ಸಃ ಅಯಂ ಪ್ರಸಾದಮ್ ಅಧಿಗಚ್ಛತಿ । ಪ್ರಸಾದಃ ಪ್ರಸನ್ನತಾ ಸ್ವಾಸ್ಥ್ಯಮ್ ॥ ೬೪ ॥

ಆತ್ಮೇತಿ ; ವಿಧೇಯಾತ್ಮೇತಿ ;

ಇಂದ್ರಿಯಾಣಾಂ ವಿಷಯೇಷು ಪ್ರವೃತಿಶ್ಚೇತ್ , ನಿಯಮಾನುಪಪತ್ತ್ಯಾ ವರ್ಜನೀಯೇಷ್ವಪಿ ಸಾ ಸ್ಯಾತ್ , ಇತ್ಯಾಶಂಕ್ಯಾಹ -

ಆತ್ಮೇತಿ ।

ಅಂತಃಕರಣಾಧೀನತ್ವೇಽಪಿ ಇಂದ್ರಿಯಾಣಾಂ ತದನಿಯಮಾತ್ ತೇಷಾಮಪಿ ನಿಯಮಾನುಪಪತ್ತಿಃ, ಇತ್ಯಾಶಂಕ್ಯಾಹ -

ವಿಧೇಯಾತ್ಮೇತಿ

॥ ೬೪ ॥