ವಿಷಯಾಣಾಂ ಸ್ಮರಣಮಪಿ ಚೇದನರ್ಥಕಾರಣಮ್ , ಸುತರಾಂ ತರ್ಹಿ ಭೋಗಃ, ತೇನ ಜೀವನಾರ್ಥಂ ಭುಂಜಾನೋ ವಿಷಯಾನ್ ಅನರ್ಥಂ ಕಥಂ ನ ಪ್ರತಿಪದ್ಯತೇ ? ಇತ್ಯಾಶಂಕ್ಯ, ವೃತ್ತಾನುವಾದಪೂರ್ವಕಮುತ್ತರಶ್ಲೋಕತಾತ್ಪರ್ಯಮಾಹ -

ಸರ್ವಾನರ್ಥಸ್ಯೇತಿ ।

ಅನರ್ಥಮೂಲಕಥನಾನಂತರ್ಯಮಥಶಬ್ದಾರ್ಥಃ ।

ಪರಿಹರ್ತವ್ಯೇ ನಿರ್ಣೀತೇ ತತ್ಪರಿಹಾರೋಪಾಯಜಿಜ್ಞಾಸಾಂ ದರ್ಶಯತಿ -

ಇದಾನೀಮಿತಿ ।

ರಾಗದ್ವೇಷಪೂರ್ವಿಕಾ ಪ್ರವೃತ್ತಿಃ, ಇತ್ಯತ್ರ ಅನುಭವದರ್ಶನಾರ್ಥೋ ಹಿಶಬ್ದಃ । ಶಾಸ್ತ್ರೀಯಪ್ರವೃತ್ತಿವ್ಯಾಸೇಧಾರ್ಥಂ ಸ್ವಾಭಾವಿಕೀ ಇತ್ಯುಕ್ತಮ್ । ತತ್ರೇತ್ಯಧಿಕೃತಾನ್ ಅಧಿಕೃತ್ಯ ಪ್ರಯೋಗಃ । ಅವರ್ಜನೀಯಾನ್ ಅಶನಪಾನಾದೀನ್ , ದೇಹಸ್ಥಿತಿಹೇತೂನಿತಿ ಯಾವತ್ ।